Sámiráđđi lea ásahan muitofoandda gudnejahttin dihte Jevgenij Jushkova doaimma ja eallima. Foandda ulbmil lea movttiidahttit ja doarjut Ruošša beale sámiid geat háliidit čađahit sámegieloahpahusa.
Oahpahus sáhttá leat buot 10 sámegillii, ja sáhttá čađahuvvot Suomas, Norggas, Ruoššas dahje Ruoŧas. Doarjja sáhttá adnot oahppodoarjjan, oahpponeavvuid oastimii dahje oahpahusgoluid gokčamii.
Sámiráđđi almmuha vuosttaš stipeandaohcamiid vuoru. Oanehis motivašuvdnareivve mas čilget oahppoplánaid ja goluid mat dasa gullet, sáhtát sáddet čujuhussii: saamicouncil@saamicouncil.net.
Sámiráđđi fuomášahttá ahte dušše ruoššabeale sámit sáhttet ohcat stipeandda. Organisašuvnnat ja ásahusat eai sáhte ohcat doarjaga. Muitofoandda stivra gieđahallá ohcamušaid. Ohccit ožžot dieđu mearrádusas čálalaš hámis. Mearrádusaid ii sáhte váidit.
Ohcanáigemearri: Guovvamánu 29. beaivi 2024
