-Almmuhus-
-Almmuhus-
OĐĐASAT Sámi logut muitalit 12 geigejuvvui

Sámi logut muitalit 12 geigejuvvui

-

-

Gaskavahkku almmuhuvvui Sámi logut muitalit 12 sámedikkis Kárášjogas. 

Nordlándda fylkkamánni seniorráđđeaddi, Kevin Johansen, geigii Sámi logut muitalit 12 stáhtačállái Anne Karin Olli ja Sámediggeráđđelahttui Mikkel Eskil Mikkelsen. Sámediggi ja Kommunála- ja ođasmahttindepartemeantta leat dorjon barggu. 

Dán háve oahpista Per Ravna loguide kultuvrralaš konteavsttas, mas fuomášuhttá sámi lohkoipmárdusa. Julie Aslaksen ja Jørn Kristian Undelstvedt čálliba areálageavaheami birra Sámis. Astrid Eriksen ovdanbuktá ođđa dutkama, mas lea statistihkka seksuálalaš illastemiid birra, ja vuolláičálli čájeha movt ohppiidlohku rievddada gáiddusoahpahusas julevsámi ja lullisámi guovlluin. 

Anders Sønstebø lea čállán kapihttala mas lea listu sámi loguid birra. Dan maŋemus guoktenuppelohkái jagis lea Sámi statistihka fágalaš analysajoavku almmuhan badjel gávccilogi artihkkala main leat kommenteren sámi statistihka máŋgga guovddáš surggiin. Mii mearkkašit ahte dađistaga leat eambbosat beroštišgoahtán ja lea maid lassánan dárbu sámi statistihkkii sihke politihkkariin, byråkráhtain, dutkiin ja earáin. Buot artihkkalat leat rabas ja leat olámuttos buohkaide neahttasiiddus samilogutmuitalit.no

-Almmuhus-