Sámediggi vállje vuoruhit guolástusaktivitehta sámi riddo- ja vuotnaguovlluin ja doarju danne ruđalaččat.
Sámediggeráđi maŋimuš čoahkkimis diibmá juolluduvvui doarjja Kamøyvær riddosearvái Davvenjárgga gielddas 300 000 ruvdno káijarusttega divvumii ja ođđa ávdnenskajáide nannen dihtii bálvalusfálaldaga nannámis.
– Káijarusttet ja ávdnenskaját leat doaibmabijut mat bohtet ávkin guovllu guolástusealáhussii, dadjá sámediggeráđđi Silje Karine Muotka preassadieđáhusas.
Son oaivvilda ahte dá lea dehálaš infrastruktuvra árjjalaš riddofatnasiidda.
Čoahkkimis juolluduvvui maiddái 270 000 ruvnno Krigerfisk AS:i Davvenjárgga gielddas, Mads Gerhardsen bokte, ođđaáigásaš bivdofatnasiidda oktan reaidduiguin.
Doarjja galgá boahtit buorrin investeremii.
– Sámediggi áigu dáinna doarjagiin váikkuhit riddolagaš guolástusealáhusa nannema sihke mearas ja nannámis. Dakko bokte váikkuha Sámediggi dasa ahte guolásteaddjit geat háliidit álggahit doaimma iežaset fatnasiin vuosttaš gearddi ožžot ruhtadanveahki, dadjá Muotka.
Áigot bisuhit bivdoaktivitehta
Muotka dadjá ahte Sámediggi dahká dán huksen dihtii ja bisuhan dihtii guolástusaktivitehta sámi riddo- ja vuotnaguovlluin, ja mihttomearrin lea háhkat buoret rámmaeavttuid fanasođasmahttimii ja dieinna lágiin nannet ođđarekrutterema guolástusfidnui.
Sámediggi lea diibmá juolludan oktiibuot 6 368 000 ruvnno doarjaga guolástusealáhussii.
– Dá lea dehálaš veahkki. Maŋimuš jagiid lea rekrutteren guolástussii leamaš jeavddalaš ja buorre. Dat čájeha ahte Sámediggi lea šaddan dehálaš doarjjaaddin guolástusa ahtanuššamii rittus, dadjá Muotka.
Doarjja maiddái mátkeealáhusaide
Sámediggeráđđi attii doarjaga maiddái muhtun eará ealáhusprošeavttaide maŋimuš ráđđečoahkkimis ovdal juovlaluomu.
Mátkeealáhusfitnodat Destinasjon 71 grader Nord Davvenjárgga gielddas oaččui 300 000 ruvnno muorralávuid ceggemii.
Fitnodat áŋgiruššá erenoamážit fanasturisttaiguin ja hurtigrute-fatnasa ektui Davvenjárgga gielddas.
– Mátkeealáhus lea eará ealáhus mii lea ahtanuššamin, ja dán oktavuođas lea sáhka nana prošeavttas mas leat hárjánan eaiggádat geat barget mátkeealáhusdoaimmain mii juo lea ásahuvvon. Sii háliidit viiddidit doaimmaset, ja ledje ráhkadan buori plána dása, deattuha Muotka.
Eambbo doarjagat
Fitnodat NT Eiendom ANS Skiervvás oaččui 400 000 ruvdnosaš doarjaga hukset bádjehálla.
Fitnodat bargá bajásdoallamiin ja el-rávdnjeinstallašuvnnaiguin guolástus- ja mearrageavahusealáhusas.
Maiddái eará Skiervvá suohkana fitnodat, Kurt Einarsen AS, oaččui doarjaga Sámediggeráđis. Sii ožžo maiddái 400 000 ruvnno fatnasa ja govdunkáija investeremii.
Mátkeealáhusfitnodat áigu áŋgiruššat mearraturismmain ja earenoamážit lágidit fálissafarimátkkiid Skiervvás, maid ohcalit dađistaga eanet.
– Mun lean movtta go mii sáhttit addit doarjaga ealáhusdoibmii sihke Davvenjárgga ja Skiervvá ealáhusdoibmii, dadjá Muotka vel loahpas preassadieđáhusastis.
