-Almmuhus-
-Almmuhus-
OĐĐASATSámediggi ii lean bovdejuvvon

Sámediggi ii lean bovdejuvvon

-

-

Sámediggeráđđelahttu ii loga Sámedikki ožžon bovdehusa searvat mannan vahkku geahčadeapmái, guovllus gosa leat plánen cegget bieggamillopárkka. 

Grenselandet AS lea plánen cegget gaskkal 100-200 turbiinna Vuonjalráššii, bieggamillo­pro­šeavtta leat gohčodan «Davvi».

Mannan gaskavahkku ledje ­bovden orohagaid, Finnmárkku fylkkamánni ja eará berošteddjiid geahčadit guovllu helikopteriin, duogáš geahčadeamis lea go leat váikkuhusguorahallama čađa­heamen.

Sámediggi ii lean oidnomis, ja sivva dasa lei go eai lean bovdejuvvon, muitala sámedigge­ráđđelahttu Silje Karine Muotka.

– Eai lean bovden Sámedikki, Grenselandet AS čađahii geahča­deame ja lei bovden iešguđet aktevrraid. Gullen ságaid dan geahčadeame birra beaivvi ovdal, isken gii mis lei vuolgimin ja ­dalle bođii ovdan ahte Sámediggái ii lean boahtán bovdehus, lohká ­Silje Karine Muotka. 

 

Sádden šállošeame

Silje Karine Muotka ii loga heađás­tuvvat go eai lean bovdejuvvon, ja lohká jus NVE livččii čađahan, de ledje sii maid lunddolaččat ­bovdejuvvon.

– Grenselandet AS leat šállošan ja lohket boastuvuohtan go Sáme­diggi ii lean bovdejuvvon. Čálle ahte áigo eambbo geahčademiid čađahit, dadjá Muotka. 

 

Ii leat heahti

Son lohká nuppi dáfus de lea nu ahte jus lea dárbu Sámediggái geahčadit guovllus, ovdamearkka dihtii kulturmuittuid dahje eará dieđuid, de sáhttá Sámediggi lágidit geahčadeame.  

– Ii leat heahti go eat lean bovde­juvvon, muhto lea dehálaš oažžut ovdan ahte eat lean ožžon bovdejumi. Ii leat nu ahte Sámediggi ii beroš áššis, deattuha Muotka.

 

Eai doarjjo

Sámediggi ii doarjjo «Davvi» prošeavtta ja leat gulaskuddama oktavuođas dan mearrádusa dahkan. 

– Mii leat sádden gulaskuddan­cealkámuša juovlamánus, gos boahtá ovdan ahte lea stuorra sisabahkken ja eat doarjjo prošeavtta. Dat lea áidna formálalaš mearrádus mis dán rádjái. Mii dieđusge eat sáhte bissehit sin ohcat lobi prošektii, lohká Silje Karine ­Muotka.

 

Bohtet eambbo vejolašvuođat

–  Geahčadeami mii sáhttit čađahit iežamet dárbbuid ektui. Gos gulahallat orohagaiguin, olbmuiguin ja eará sámi berošteddjiiguin. Bohtet eambbo vejolašvuođat, loahpaha Silje Karine Muotka. 

 

Ávvir ii leat lihkostuvvan oažžut ságaide Grenselandet AS dán áššái.

-Almmuhus-