Olbmot geain leat negatiiva bohtosat leamaš leat dovdagoahtán symptomaid. Dál iskojuvvojit ođđasit.
– Olbmot leat ožžon covid-19 symptomaid vaikke sin ovddeš iskosat leat negatiivvat leamaš. Mii leat mearridan iskat daid ođđasit go virus sáhttá easka maŋŋá ealáskit, dadjá Hámmárfeastta sátnejođiheaddji Marianne Sivertsen Næss preassačoahkkimis maŋŋebárgga.
Eai dárbbaš symptomat
Preassačoahkkimis maid bođii ovdan ahte olbmuide, geain eai leat leamaš symptomat, lea duođaštuvvon njommon covid-19 virus. Dál lea okta sivva manin buot buohcceviesu bargit iskojuvvojit. Vuossárgga iske 140 olbmo.
– Lea stuorra vejolašvuohta ahte bohtet eanet positiiva vástádusat, maiddái doppe gos eat vuordde dan, dadjá Sivertsen Næss.
Eambbosat erremis
Maŋŋebárgga lea 22 olbmui njommon korona Hámmárfeasttas. 14:s sis leat buohcceviessobargit. Oktiibuot leat 168 olbmo dál erremis. Dat lohku lassána beaivvis beaivái.
– Juohke positiiva duođašteami maŋŋá lassánana njuolggooktavuohtalohku. Dat mearkkaša ahte eambbosat fertejit erremii, dadjá Sivertsen Næss.
FHI bargit Hámmárfestii
Hámmárfeastta buohcceviessu oažžu ekspeartaveahki Álbmotdearvvašvuođainstituhtas (FHI).
– Golbma bargi bohtet veahkkin. Sii eai galgga váldit badjelasaset min barggu, muhto iežaset ekspeartačehppodagain leat veahkkin njoammunguorranbarggus, dadjá Hámmárfeastta sátnejođiheaddji Marianne Sivertsen Næss otná preassačoahkkimis.
Ii čielggas
Son ii loga alddis dađi eanet dieđuid makkár rolla dán joavkkus galgá go ii leat vel čielggaduvvon ášši.
– Sii leat justa dál čoahkkimis doaktáriiguin, ja ihttin diehtit eanet dan birra, dadjá Sivertsen Næss.
Fylkkamánni
Fylkkamánni lea gohččon oktasaščoahkkima Hámmárfeastta suohkaniin ja Romssa suohkaniin. Mihttu lea kártet barggu mii lea dahkkon dássái korona ektui ja muitalit bargovásáhusaid, gokko lea buoridanmunni. Dat diehtojuohkkin galgá ávkin gielddaide, muhto maiddái sidjiide. Čoahkkin lea maŋŋebárgga diibmu 16.
Dehálaš diehtojuohkin
Hámmárfeastta suohkana bealis muitalit ahte sii leat okta dain suohkaniin gos hápmán lea. Sivertsen Næss muitala ahte nu go dilli lea dál, de sis ii leat vejolašvuohta váldit vuostá fatnasiid doppe gos bargiin leat symptomat.
– Mis ii leat kapasitehta dasa, dadjá Sivertsen Næss ja lohká sii lea duhtavaččat go Romssa suohkan dál juohká iežas vásáhusa, erenomážit fatnasiid bealis.
– Dat lea dehálaš diehtojuohkin midjiide dál, dadjá Sivertsen Næss.
Lohku lassána
Dakka maŋŋá preassačoahkkima bođii ođđa diehtu suohkana Twitter-siiddus. Diehtu lea ahte guoktásis vel lea duođaštuvvon korona. 22 olbmui lea dál njommon korona Hámmárfeasttas.
