Dearvvašvuođaeiseválddit oaivvildit ahte olbmot berrejit dál juo ráhkkanit dasa ahte leahkit ollu ruovttus, dahje juobe Norgga rájiid siskkobealde, maiddái geasset.
Gielddus fitnat iežas barttas heaittihuvvo cuoŋománu 20. beaivvi, muhto dearvvašvuođa- ja fuolahusministtar Bent Høye lohká NTB:i ahte go jurddaša makkár máilbmi olggobealde Norgga rájiid lea juste dál, de sáhttá leahkit buorre ráhkkanit ruovttus dahje Norgga rájiid siskkobealde leahkit geasseluomus.
– Norga lea máilmmi fiinna riikka, ja oallugat ožžot dál vejolašvuođa fuobmát ođđa báikkiid min riikkas, dadjá Høye.
Dávdaovdáneapmi mearrida
Ii leat dette ge áibbas sihkar ahte šaddá nu álki vánddardit sisriikkalaččat ge.
– Dat vuolgá das makkár njoammundilálašvuohta mis lea álbmogis dalle, dadjá dearvvašvuođadirektevra Bjørn Guldvog.
Dasa lassin lea váttis diehtit man oallugat guddet njoammudávdda vaikko alddiineaset eai leat dávdamearkkat, muhto geat sáhttet njoammudit dávdda earáide.
– Mun sávan dieđusge ahte mii leat dakkár dilis geassái ahte norgalaččat ožžot vejolašvuođa vásihit Norgga riikka luopmoáiggis. Muhto dan ferte dávdaovdáneapmi mearridit, dadjá Høye.
Mátkkoštanrávvagat
Olgoriikadepartemeanta lea garrasit ávžžuhan ahte olbmot eai mátkkoš olgoriikii jus ii leat áibbas dárbu, ja leat maid dieđihan ahte jus ii čuovo ávžžuhusa, de ii oaččo veahki eiseválddiin beassat fas ruoktot Norgii jus olgoriikkas čuožžila vuorddekeahtes dilli.
Dássážii ii leat vel boahtán makkárge diehtu man guhká dat ávžžuhus bistá.
