Esrange Space Center Gironis bážii mánnodaga dutkanráhkeatta, muhto juoga manai boastut ja rakeahtta gahčai Sis-Romsii, Málatvuopmái.
Rakeahtta lei ovcci mehtera guhkki ja dettii 1,6 tonna. Dat girddii rastá ráji Norgii ja gahčai Likkái, Málatvuopmái, lahka Dieváidvuovddi álbmotmeahci. Guovllus gosa rakeahtta gahčai eai oro olbmot, lagamus gilážat ja viesut leat sullii miilla eret Rostuvuovddis. Guovllus leat maid Lávnjitvuomi čearus guohtuneatnamat ja barttat.
Norgga eiseválddit dieđihit ahte lea duođalaš ášši.
– Lea duođalaš ášši go dat sáhttá dagahit stuora vahága. Go rádji loavkiduvvo, nu go dál lea geavvan, de lea deaŧalaš ahte ovddasvástideaddjit dakkaviđe dieđihit Norgga eiseválddide mii lea geavvan, dadjá Norgga OD Ragnhild Haland Simenstad NTB:i.
Vižžon eret
Esrange Space Center Gironis lea ohcan seaivunlobi viežžat eret rakeahtta guovllus gosa dat gahčai. Gaskavahku iđđedis dieđihit sii preassadieđáhusa bakte ahte rakeahtta lea vižžon eret.
– Disdaga vieččaimet rakeahta helikopteriin. Dál mii iskat mii manai boastut go bážiimet rakeahta. Lea dáhpáhus man váldit duođas. Lei plána ahte rakeahtta galggai seaivut Ruoŧa beale duottarguvlui. Dál mii iskat mii dáhpáhuvai, dadjá Esrange Space Centera rakeahtta- ja balloŋgahoavda Marko Kohberg.
