Sámediggeráđđi lea juolludan oktiibuot 960 000 ruvnno golmma giellaovddidanprošektii; Hámmerfeasttas, Láhpis ja Málatvuomis.
– Sámediggeráđi áigumuš lea čalmmustahttit ja nannet giela ja kultuvrra mearrasámi guovlluin, ja váikkuhit positiivvalaš ovdáneapmái doppe. Danne mii 2024-bušeahtas vuoruhit mearrasámi guovlluid, lohká sámediggeráđđi Mikkel Eskil Mikkelsen (NSR) preassadieđáhusastis.
Ruhtadeapmi ásahit giellaguovddáža
Sámediggeráđđi juolluda 400 000 ruvnno vuosttaš jagi álggahandoarjjan Hámmerfeastta suohkanii go áigot ásahit giellaguovddáža Jáhkovutnii.
Hámmerfeastta suohkanis lea áigumuš ásahit gelbbolašvuođaguovddáža (giellaguovddáža) Jáhkovutnii. Suohkan lea 2023 giđa čađahan ovdaprošeavtta man ulbmil lei gártet, čalmmustahttit, dokumenteret ja vuođuštit man stuora dárbu lea gelbbolašvuođaguovddážii, ja ovdaprošeakta čájehii ahte lea dehálaš oažžut johtui doaibmabijuid ealáskahttin dihte sámegiela suohkanis go eai leat šat nu oallugat geat hálddašit sámegiela.
Gullat ja oahppat sámegiela duddjoma oktavuođas
Sámediggeráđđi juolluda 60 000 ruvnno doarjjan Láhppi Sámiid Searvái prošektii mas galget lágidit dipma- ja garraduodjekurssaid Sáttomohgáttis/Sandland Láhpis 2024 geasi. Sii háliidit addit sidjiide, geat eai huma sámegiela, vejolašvuođa gullat ja oahppat sámegiela duddjoma oktavuođas. Kursaoasseváldit galget maid beassat oahpásmuvvat guovllu duodjeárbevieruide.
Láhppi Sámiid Searvi bargá aktiivvalaččat viidásetfievrridit sámi árbemáhtu ja fuolahit sámi kulturárbbi. Láhppái lea dáruiduhttinpolitihkka čuohcan garrasit. Sii háliidit dahkat sámi giela ja kultuvrra olahahttin nuoraide ja rávisolbmuide geat ohcet iežaset sámi duogáža ja identitehta.
Dárbu deaivvadanbáikkiide
Sámediggeráđđi lea maid juolludan Málatvuomi suohkanii 500 000 ruvnno giellaguovddáža nuppi jagi ásahandoarjjan. Jagi 2024, nuppi jagi ásahandoarjagiin sii áigot lágidit eanet giellagurssaid ja -arenaid, visot ulbmiljoavkkuide, sihke sámegielagiidda ja olbmuide geat háliidit oahppat davvisámegiela. Giellaguovddáža ulbmil lea maiddái fállat giellagurssaid ja -arenaid olggobealde Málatvuomi, eará lagas guovlluide Gaska-Romssas.
– Gaska-Romssas lea dárbu deaivvadanbáikkiide gos sámi biras, sihke sii geat máhttet sámegiela ja sii geat háliidit oahppat sámegiela, besset deaivvadit. Giellaguovddáš galgá leat sámegiela guovddážis Gaska-Romssas ja dainna galget maiddái čalmmustahttit ahte guovllus leat sápmelaččat ja sámegiella, dadjá Mikkelsen.
Buot doarjagat leat juolluduvvon doarjjaortnegis Giellaovddidandoaimmat, mas mihttu lea ahte organisašuvnnat ovddidit ja fállet oahpahusa sámegielas. Ođđajagemánu 1. beaivvi 2024 rahppojuvvojit Sámedikki doarjjaortnegat 2024 jahkái.
