-Almmuhus-
-Almmuhus-
OĐĐASATRomssas lihkos­tuvvet bisse­heames korona

Romssas lihkos­tuvvet bisse­heames korona

-

-

Ii ovtta ge báikkálaččas leat duođaštuvvon koronavirus maŋimuš jándora, muhto Romssa suohkan dieđiha dattege 16 ođđa njoammuma. Dat barget buohkat Ruošša fatnasis mii bođii gáddái dán vahkkus. 

Romssa suohkanis leavvagođii koronavirus nuoraid gaskkas moatti vahkku áigi. Dalle mearriduvvojedje báikkálaš gáržžideamit eastadan dihte njoammuma ja golmma joatkkaskuvllas iske moadde duháha skuvlaoahppi ja bargi. Doaibmabijuin leamaš ávki. 

– Ii ovttage báikkálaččas leat duođaštuvvon koronavirus maŋimuš jándora, ja dá lea vuosttaš gearddi go dat dáhpáhuvvá golggotmánu 24. beaivvi rájes, dieđihii Romssa suohkana váldodoavttir Kathrine Kristoffersen otná preassakonferánssas. 

Son rámida romsalaččaid. 

– Mánáidgárddiin ja skuvllain leat bargan buori barggu ja nuorat ánssášit erenomáš olu rámi maŋŋel go leat lihkostuvvan bissehit koronaleavvama. Mis leat maid erenomáš buorit dearvvašvuođabargit geat čađahit iskosiid, gurret njoammumiid  ja čuovvulit buhcciid. Sis leamaš máilmmi olu bargu, muhto eai leat bisánan vaikke leat váiban. Suohkanis leat maid bassit čađahan dehálaš barggu. 

Iskan masá 400 olbmo beaivválaččat 

Skábmamánus leat Romssa suohkana koronaguovddážis dássážii váldán masá 400 koronaiskosa beaivválaččat. 

– Gaskamearálaččat leat iskan 395 olbmo beaivái ja mii leat vástidan 80 proseantta buot telefovnnain. Koronatelefovnnas leat veahkehan 7677 dán mánus, lohká Romssa koronaguovddáža fágajođiheaddji Øivind Benjaminsen. 

Suohkana váldodoavttir jáhkká dan barggu leamaš hirbmat dehálažžan go koronavirus leavvagođii moatti vahkku áigi. 

– TISK nammasaš bargovugiin leat lihkostuvvan bissehit leavvama. Olbmot leat árrat iskojuvvon, biddjon erremii dahje isolašuvdnii ja mii leat čađahan vuđolaš njoammunguorrama. Jus logut ain njidjet, de beassat maiddái fargga loahpahit báikkálaš njoammuneastadannjuolggadusaid, dadjá váldodoavttir Kathrine Kristoffersen. 

16 ruoššas koronavirus

Vaikke Romssa suohkanis njiedjá koronanjoammun, de bissu statistihkka badjin. Dán vahkkus oainnat bođii Ruošša guollefanas «Aquamarine» gáddái ja doppe lea duođaštuvvon covid-19. 

– Okta bargi biddjui isolašuvdnii vahkku áigi ja čájehuvvo ahte sus lea koronavirus. Son lea dál Davvi-Norgga universitehtabuohcceviesus. Mii leat čađahan iskosa buot 42 bargis ja oktiibuot lea koronavirus njommon 16 bargái. Sii leat isolašuvnnas ja earát ges erremis, lohká Kristoffersen. 

Ruošša fatnasis lonuhedje bargiid vahkku áigi Romssas.

– Mii leat ožžon dihtosii ahte buot bargiin lei negatiiva koronaiskkus beaivvi ovdal go manne fatnasii. Sii eai galgga leamaš gostege gáttis maŋŋel go vulge Romssa hápmamis. Mii guorragoahtit njoammuma odne, dadjá koronaguovddáža fágajođiheaddji Øivind Benjaminsen. 

-Almmuhus-