Vuossárgga suoidnemánu 6. beaivvi rájes heaittihuvvo mielčuovvogáržžidus bussiin, leaktofatnasiin ja fearggain Romssas ja Finnmárkkus.
Mearrádus lea dahkkon fylkkasuohkana gearggusvuođalávdegottis ja lea vuođđuduvvon dálá njoammundilálašvuođas. Sullasaš mearrádusat leat čađahuvvon eará fylkkain.
– Dál lea unnán njoammun Davvi-Norggas ja mii doaivut ahte lea dohkálaš rahpat eambbo saji kollektiivajohtolagain. Mii áigut doalahit nana čorgema buot fievrridangaskaomiin, ja joatkit diehtojuohkinbargguin man mii addit mátkkošteddjiide dálá mátkeráđiid birra, dadjá Romssa ja Finnmárkku fylkkasuohkana johtalusa fylkkaráđđi Kristina Hansen (Bb).
Kollektiivajohtolaga bagadeaddji
Lea jotkkolaččat bargon nationála ovdánemiin ja ođasmahttimis kollektiivajohtolaga bagadeddjiin. Romsa ja Finnmárku lea leamaš aktiiva oassálasti dan barggus, ja čuovvu ain nationála njuolggadusaid. Dál maid dahkkojit báikkálaš heivehusat vuođđuduvvon fágalaš árvvoštallamiid vuođul njoammundilálašvuođa ektui.
– Mii čuovvut dilálašvuođa dárkilit. Deháleamos maid mii bargat lea veahkehit njoammuma eastadeami. Jus njoammundilálašvuohta rievdá dahje jus bohtet ođđa nationála gáibádusat, de mii jođánit muddet doaibmabijuid kollektiivajohtolagas, dadjá fylkkaráđđi Kristina Hansen (Bb).
Mátkeráđit gustojit ain
Dilálašvuohta ii leat vuos nu go dábálaččat. Vuđolaš njoammungáhttendoaibmabijut kollektiivajohtolagas gohččot buozas olbmuid doalahit ruovttus, ja ahte buohkat galget praktiseret buori giehta- ja gossanbuhtisvuođa. Mátkkošteaddjit kollektiivajohtolagas ráđđejuvvojit maid árvvoštallat mátkki dárbbu, garvit mátkkoštit hušas áiggis ja doala gaskka eará mielčuovvuide.
– Mii bivdit min operatevrraid sihkkut merkemiid čohkkánsajiin mat eai leat leamaš olámuttos mátkkošteddjiide. Mun háliidan maid dán oktavuođas giitit mielčuovvuid, operatevrraid, vuddjiid ja eará bargiid kollektiivajohtolagas dan stuorra ovttasbargomielalašvuođas, heivehallannávccain ja fleksibilitehtas dán gáibideaddji dilálašvuođas mas mii buohkat leat, dadjá Kristina Hansen (Bb).
