Guovdageainnu suohkan oažžu 5,5 miljovnna ruvnnu 2023:s. – Iluin vásihat ahte nuppástuhttinbargu Guovdageainnus lea olahan buori bohtosiid oanehis áiggis, dadjá ealáhusaid, plánaid, kultuvrra ja birrasa fylkkaráđđi, Marlene Bråthen (Gb).
Guovdageainnu suohkan oaččui nuppástuhttinstáhtusa 2019:s. Sivvan stáhtusii lea go sihke suohkan ja Finnmárkku fylkkagielda mieđihedje ahte suohkan lei hui duođalaš dilis, sihke ealáhuslaččat ja servodatlaččat.
– Vuođđun prográmma aktivitehtas, ovdánahttinprošeavttain, lohku ohcciin ja dohkkehuvvon prošeavttain de lea prográmma hui bures čuvvon vuordámušaid, dadjá son.
Fylkkaráđđi háliida joatkit stáhtusiin Guovdageainnu suohkanis: Guovdageaidnu oažžu jahkásaččat 5,5 miljovnna ruvnnu Romssa ja Finnmárkku fylkkasuohkanis. Prográmma bistá 2025 lohppii.
Eambbo doarjja
Guovdageainnu suohkan oažžu maiddái eará doarjaga: Fylkkaráđđi addá ruhtadeami ásahit ja ovdánahttit suohkana friddjaeallima, oahppama ja birgema fálaldagaid 2023 ovddas. Dás oažžu suohkan 427 813 ruvnnu.