Olav Fykse Tveit bovde álbmoga álbmotčoahkkimii ságastallat servodaga ja girkoeallima birra.
Preses, Norgga girku jođiheaddji bisma, Olav Fykse Tveit galleda Kárášjoga ja Porsáŋggu dán vahkku. Maiddái Davvi-Hålogalándda bisma, Olav Øygard, lea mielde dán mátkkis.
Ulbmil galledemiin lea oahppat eambbo sámi ja kveana kultuvrra ja girkoeallima birra.
Duorastaga lea Preses Porsáŋggus gos deaivvada girkolaš bargiiguin geat muitalit golmmakultuvrralaš Porsáŋggu birra, namalassii sámi, kveana ja dáža kultuvrra birra. Preses galleda maid Kveana instituhta Bissojogas.
Bearjadaga lea Preses Kárášjogas gos son earret eará galleda Sámedikki ja SÁNAG, Sámi Našuvnnalaš gealboguovddáža. Lávvordaga searvá Preses ipmilbálvalussii Šuoššjávrris.
Álbmotčoahkkin
Sihke duorastaga eahkes Porsáŋggus, ja lávvordaga maŋŋelgaskabeaivvi Kárášjogas, lágiduvvo álbmotčoahkkin gosa Preses bovde álbmoga boahtit ságastallat servodaga ja girkoeallima birra.
– Kárášjogas boahtá boazodoalli Leif Anders Somby muitalit makkár hástalusat boazodoalus leat ja sálbmalávlunjoavku «Lávlunboddu» maid searvá álbmotčoahkkimii, čállá Sis-Finnmárkku proavás Egil Lønmo preassadieđáhusas.
