Ruoŧa beale Sámediggi lei maid bovdejuvvon Norgga beale Sámedikki ovccát rahpamii. Ruoŧa beale Sámedikki dievasčoahkkinjođiheaddji Daniel Holst muitala ahte ledje olu buorit áššit maid váldá mielde Ruoŧa beallái.
Daniel Holst muitala son lea Ruoŧa beale Sámedikki dievasčoahkkinjođiheaddji ja ovddastii Ruoŧa beale Sámedikki Norgga beale Sámedikki ovccát rahpamis. Sus lei maid sáhkavuorru rahpandilálašvuođas.
Dá lea su sárdni.
– Mu mielas leamaš duođaid hui hávski fitnat dáppe. Leat olu buorit áššit maid heive váldit mielde Ruoŧa beale Sámediggái. Dehálamos dán vuoru lea Norgga beale Sámedikki viessu. Sámediggi lea mearridan ahte parlameantaviessu galgá huksejuvvot Staarii, muhto mo dan ruhtadit, dan in dieđe. Stivra ferte dan vástidit. Ovddeš stáhtaministtar Göran Persson lohpidii 1994:s ahte galgá huksejuvvot Ruoŧa beale Sámediggái parlameantaviessu. Muhto ii mihkkege leat dáhpáhuvvan ja mii leat ain vuordimin daid ruđaid, lohká Ruoŧa beale dievasčoahkkinjođiheaddji Daniel Holst.
