«Mu siellu máidnu Hearrá, ja mu vuoigŋa ávvuda Ipmila, mu beasti, dihte. Dasgo son lea geahččan vuollegis bálvaleaddjásis. Dás maŋás buot buolvvat máidnot mu ávdugassan, dasgo Veagalaš lea dahkan munnje stuorra daguid, bassi lea su namma. Buolvvas bulvii su váibmoláđisvuohta bistá sidjiide geat ballet sus. Son dahká veagalaš daguid gieđainis, son biđge sin geain leat čeavlás jurdagat váimmus. Son norddasta ráđđejeddjiid sin truvnnuin ja alida vuollegaččaid. Son biebmá nealguid buriid attáldagaiguin, muhto riggáid son vuolggaha eret guoros gieđaid. Son veahkeha bálvaleaddjis Israela ja muitá iežas árpmu, nugo lohpidii min áhčiide, Abrahamii ja su sohkii, agálaš áigái. Maria orui Elisabeta luhtte lahka golbma mánu ja máhcai dasto ruoktot» (Luk 1, 46-56).
Dát vearssat Biibbalis leat Maria máidnunlávlla. Hearrá eŋgel lea finadan Maria guossis ja muitalan mii dál dáhpáhuvvá. Maria lea váldán duohtan dan doaimma maid Ipmil lea bidjan sutnje, namalassii riegádahttit máilmmi beasti. Danne diđii Maria mii lea vuordagis. Go son joavddai fuolkkis Elisabeth lusa, de giitališgođii Hearrá gii lea dahkan stuora daguid sutnje. Maria lei geafes nuorra nieida iige oktage lean gullan ahte son lea bargan maidege bargguid mat livčče máinnašan veara. Muhto go Ipmila bárdni galgá riegádit, de ii válljejuvvo stuora šloahtta ja gonagasviessu báikin. Ipmila riikkas ii adnojuvvo fápmu, riggodat iige máilmmi viisodat, muhto luohttámuš ja osku.
Maria illuda ja son gohčoda Hearrá beastin. Máidnumis son namuha ahte Ipmil lokte sin geain lea unnán árvu, ja biebmá sin geain lea unnán biebmu ja čájeha ahte Ipmil lea dás odne ja dál, su váibmoláđisvuođainis. Ipmil ii gierdda vuoigatmeahttunvuođa ja boasttu fápmogeavaheami. Mii leat buohkat smávvát Ipmil muođuid ovddas, ja aiddo danne han Ipmil oaidná min.
Maria čájeha stuora luohttámuša dasa ahte Ipmil doallá lohpádusaid mat leat addojuvvon juo Boares testameantta áiggis, Abrahama rájes. Ipmila lohpádusat vulget Ipmilis ja addojuvvojit olbmuide áibbas ánssáškeahttá. Maria máidnunlávlla sáhttá leat ovdagovvan midjiide go son bijai luohttámuša ahte Ipmil lea su mielde vaikko orui veadjemeahttun dilli sus. Midjiide lea buohkaide rávkojupmi váldit vuostá máilmmi beasti. Ja bissut su siste. Ja árgabeaivvis muitit ahte Ipmil lea min lahka, son lea mielde min eallimis, ja váldá orrunsaji min siste. Min árgabeaivvi bargguid siste.
Lehkos Maria máidnunlávlla min lávlla ja giittus Ipmil Áhččái guhte lea lohpidan leat min mielde. Buolvvas bulvii bistá Ipmila váibmoláđisvuohta. Danin rohkadalan addos Bassi Vuoigŋa midjiide oskku vai mii oktan Marian máidnut Ipmila!
