Dás ii leat juvddálaš iige greikalaš, ii šlávva iige friddja, ii olmmái- iige nissonolmmoš, dasgo dii buohkat lehpet okta Kristus Jesusis. Gal.3,28.
Biibbalteaksta lea vástádus dan kultuvrralaš rádjái mii lei juvddálaččaid ja greikalaččaid gaskkas. Juvddálaš njunnošat vealahedje ja dulbmo daid geat eai lean juvddálaččat. Greikalaš ii dohkken boradit juvddálaččain. Jesus Kristus buvttii áibbas eará ortnega. Su struktuvrrat eai vealahan olbmuid. Son fátmmastii maiddái greikalaččaid ja báhkiniid, ja sárdnidii árpmu ja friddjavuođa. Dát nuppástus lea lokten buot olbmuid olmmošárvvu, beroškeahttá čearddas.
Guovvamánu 1917:s čoahkkinaste sápmelaččat Troanddima Metodistagirkus. Sii álggahedje sálmmain Máidnot, máidnot Hearrá, gii stuorisin su árpmus dahká. Go su divrras nammii mii čoagganit, de lea son lahka.(Sálbmagirji nr. 8). Dát máhtolaš sápmelaččat eai diktán dáruiduhttima kultuvrralaš rájiid njeaidit sin. Sii čoagganedje ja álggahedje čoahkkima sálbmalávlumiin. Losses áiggis lei jeđđehussan diehtit ahte Ipmil ii geahča olbmo hápmái, leažžá sis alla virgi dahje ii, sápmelaš dahje dáčča? Sii osko ahte Ipmil lea olbmo mielde árgabeaivvi dilis. Riikačoahkkima áirasat, 107 jagi dás ovdal, eai vuođđudan bargguid iežaset návccaide, muhto dasa guhte leat badjelis go olbmot. Sii dihte ahte servodaga struktuvrrat eai mearkkaš maidege Ipmila čalmmiin. Sin dorvu lei Biibbala duođaštus ahte Ipmil lea sin lahka, ja buot olbmuin lea olmmošárvu riegádeamis.
Dan áigge ii lean vuos Ovttastuvvan našuvnnaid olmmošvuoigatvuođaid julggaštus mii nannii olmmošárvvu. Julggaštus ilmmai 1948:s. Girkolaš áirasat ledje njunnošis oaččuheame máilmmiriikkaide oktasaš árvovuođu. Girku bargui gullá olmmošárvvu nannen, ja vuoiŋŋalaš ja árgabeaivválaš eallin gullet oktii. Dan ipmirdii Metodistagirku mii doarjjui sápmelaččaid rahčamušaid. Biibbal muitala ahte Jesus elii eatnama alde gasku olbmuid árgabeaivvis ja lei olbmuid lahka dan dilis mas guhtege lei eallimis. Riikačoahkkima sálbmalávlun čájeha ahte dát áddejupmi lei lunddolaš. Oktasaš osku gievrudii sin searválaga dáččaolbmuiguin ovddidit politihkalaš áigumušaid Metodistagirkus.
Maiddái odne lea áigeguovdil lávlut Máidnot, máidnot Hearrá, gii stuorisin su árpmus dahká. Lávlun addá doaivvu mii lea badjelis olmmošlaš návccaid ja oskku mii guoddá eallima čađa.
