-Almmuhus-
MAGASIIDNAOtná jurdagat: Guhkes­bearjadat jorai buorrin

Otná jurdagat: Guhkes­bearjadat jorai buorrin

-

-

Lei juo guđát diibmu. Dalle, beaiveguovdil, šattai seavdnjatvuohta oppa eatnama miehtá, ja dat bisttii gitta ovccát diimmu rádjái. Lukas 23, 44.

Guhkesbearjadaga biibbalteaksta muitala ahte Jesusa mátkki eatnama alde doalvvui su ruossa guvlui. Álo Jesus beroštii olbmuin. Su ámmát eatnama alde lei olbmuid dearvvašmahttit, dálkkodit ja loktet sin árvvu geat ledje dulbmojuvvon. Son lei oskkáldas dan ámmáhii mii sus lei eatnama alde. Ja dál fertii Jesus, nu mo ráŋggáštusfáŋga galggai dahkat, ieš guoddit dan ruossa masa heŋgejuvvui.

Olu olbmot ledje čoahkkanan dohko gos Jesus návlejuvvui russii. Olbmot bilkidedje Jesusa. Jesus heaŋgái ruossas iige jienádan maidege olbmuide geat hiddjiidedje. Livččii álkit leamaš jus son lei čájehit suhtu. Olbmot geat leat russii návlejuvvon, leat bealuštan iežaset leat sivaheapmin. Muhto Jesus addá ándagassii olbmuide. Lei namalassii Jesusa ráhkisvuohta olbmuide mii doalvvui su russii. Son lei oskkáldas dan ámmáhii mii sutnje lei biddjojuvvon.

Guhkesbearjadaga oppa eatnama miehtá sevnnjodii beaiveguovdil. Golbma diimmu lei seavdnjat, aiddo dan áigge go Jesusa jápmin lahkonii. Jesusa siskkáldas ja olgguldas bákčasat bukte seavdnjadasa eatnamii. Ovccát diimmus Jesus jámii.

Jesus lei máŋgii namuhan máhttájeddjiide ahte son ferte jápmit. Ii oktage lean ipmirdan das maidege. Ja dál Jesusa doaibma lei návlet russii olbmuid suttuid. Ja min geaidnu Ipmila lusa manná Jesusa ruossa bokte. Nuppi oskkuartihkkalis daddjo «Mun oskkun Jesus Kristusii […], guhte russii návlejuvvui, jámii ja hávdáduvvui, njiejai jábmiid riikii, čuožžilii jábmiid luhtte […]».

Jesusa russiinávlejupmi ii buvtte maidege iluid. Muhto dat attii midjiide vuoittu. Mii vuittiimet dan ahte mii beassat vuorbádallat Jesus biktasa ja gilvalit beassat oasálažžan Ipmila riikii. Ja dat lea stuora vuoitu. Jesusa jápmin addá midjiide vejolašvuođa guoddit min suttuid Jesus Kristusa ovdii guhte návle daid russii. Jesusa jápmin ja bajásčuožžileapmi attii ođđa álggu. Dan álggu ahte mii leat friddjandahkkojuvvon. Ja dat bistá agálaččat.

Biibbalis muitaluvvojit ovdamearkkat mat duođaštit ahte mii leat buresboahtimat ruoktot jus mii leat láhppon. Mii gullat láhppon sávzza birra, golleruđa birra mii lei láhppon ja gávdnui, bártni birra guhte stajidii opmodaga ja máhcai fas áhči vissui. Visot dát muitalit Ipmil Áhči stuora ráhkisvuođa birra ja dan friddjandahkkojumi mii fállojuvvo buohkaide.

Mii eat ipmir vuos ollisvuođa. Eai Jesusa máhttájeaddjitge ipmirdan maid Jesus muitalii. Mii ipmirdit bihtáid mielde. Danne mii fertet oskut ahte mii álo leat buresboahtimat ruoktot.

-Almmuhus-