Ođđajagimánu rohkos maid Rávdná Turi Henriksen lea čállán.
«Dárko dan luotta man leat vázzimin, de don jođát álo nana eatnama alde.». Sátneláskkut 4,26.
Boares jahki lea vássán ja ođđa jahki álgán. De heive guorahallat mo bargat ovddosguvlui. Dát biibbalvearsa rávve min dárkut dan luotta maid mii vázzit. Mii dárkut go mihttet ja dárkilit geahččat lea go dát rivttes luodda dahje geaidnu. Dárkut lea vejolaš dušše dalle go don dieđát mii du áigumuš lea go leat vázzime dahje leat pláneme doaimmaid.
Vuosttaš oskkuartihkkalis daddjo ahte Ipmil lea almmi ja eatnama sivdnideaddji. Visot mii eallá, dan lea Ipmil sivdnidan. Olmmoš lea Ipmila bargi dáppe eatnama alde. Son bidjá min stuorát oktavuhtii go dušše min iežamet plánaide. Danne ii ávkkut luohttit dušše iežas návccaide ja olbmuid plánaide, muhto Ipmil Áhččái, guhte eaiggáduššá buot sivdnádusa ja oaidná ja diehtá mii midjiide lea buorrin.
Áhččemin-rohkosis daddjo «Šaddos du dáhttu!». Dát veadjá leat váddáseamos rohkos olbmui dadjat? Mis leat áigumušat ruovttus, bargosajis ja politihkas, muhto go mii leat Ipmila bargit eatnama alde, de fertet mii váldit vuhtii su gii lea min bajábealde. Olbmuid fápmu ja viissisvuohta lea ráddjejuvvon. Ipmila sivdnideapmi ii gula dušše ovddeš dáhpáhussii áiggi álggus. Ain otná beaivve Ipmil addá eallima, bajásdoallá ja sivdnida visot mii eallá. Jagiáiggit mearriduvvon johtolagas eanan, šattut ja eallit sihke eatnama alde ja čázis ahtanuššet ja duođaštit Ipmil Áhči sivdnidanfámu. Ipmil lea barggus juohke beaivvi. Midjiide gullá giitevašvuođain bargat bargguideamet.
Ipmil Áhčči lea lohpidan gullat min rohkadusaid ja leat min mielde gitta dán máilmmi lohppii. Min guovddáš ovddasvástádus lea mihttet dárkilit dan luotta maid mii leat vázzimin.
