-Almmuhus-
KULTUVRAOlu oahpes­olbmot čoahkka­nan Veneziai: – Lei measta nu go ruovttus

Olu oahpes­olbmot čoahkka­nan Veneziai: – Lei measta nu go ruovttus

-

-

– Lei measta nu go ruovttus ja dattetge ii lean ruovttus. Lei somá oažžut nu olu doarjaga Sámis, lohká dáiddár Anders Sunna gean dáidagat čájehuvvojedje Venezia Biennales 2022 Sámi Paviljongas.

– Dronnet Sonja lei hui smáđáhkes olmmoš ja lei suinna hui hávski háleštit. Orron vuohttimin son njuorasmuvai ovtta gaskka. Dronnet čájehii stuorra beroštumi mu dáidagii, lohká dáiddár Anders Sunna ievttá dáiddarahpama birra. 

Ánde Somby doaimmai sutnje vuorasolmmoš neavvumiin ja doarjjan, ja Anders Sunna mielas ii livčče sáhttán oažžut buoret doarjaga. Dáiddačájáhus rahpandoaluin ledje Anders Sunna, Máret Ánne Sara ja Pauliina Feodoroff njunušolbmot. Sunna lohká su mielas manne rahpandoalut bures ja buohkat dolle su mielas vuogas sártni.

– Lei olu olmmoš. Dovden ahte dát lei historjjálaš dáhpáhus go dáppe lei vuosttaš geardde Sámi Paviljonga. Dáppe ledje olu oahpes olbmot. Lei measta nu go ruovttus ja dattetge ii lean ruovttus. Lei somá oažžut doarjaga Sámis ja go nu olusat bohte.

Dáidaga rolla servodaga ovdaneapmái

Ánde Somby lea okta daid olu sápmelaččain geat leat Venezia Biennales dál. Go Ávvir jearrá manin son Itálias lea, de muitala son lea doppe vuorasolmmožin ja doaibmá ráđđeaddin ja doarjjan dáiddárii Anders Sunnai, 

– Silje Muotka ja Dronnet Sonja sártnit? Silje sárdni lei nu deaivil ja čujuhii justin dan oktavuhtii mii dáidagis ja servodaga ovdáneamis lea. Makkár rolla servodaga ovdáneapmi addá dáidagii ja makkár rolla dáidagis lea servodaga ovdáneamis. Mo dáidda sáhttá sihke čujuhit daid beliide mat eai leat nu čábbá, muhto maid leahkit ođđa ságastallamis ja hállat eará vugiin  go  dan maid servodaga ovdáneamis muđui hállet, lohká Ánde Somby. 

Lohká Muotka doalai sámi politihka luonddu várjaleami birra ja ahte buohkat dárbbašit vuogistis mielde luonddus, eai dušše sápmelaččat. 

Dronnegis alla fágalaš dássi

Sámi Paviljongas čuovui son Anders Sunna go Anders Sunna čájehii Dronnet Sonjai iežas dáidaga. Lohká dát muhtin láhkai čájeha sivilisatoralašvuođa vejolašvuođa mii lea Norgga ja sámi hálešteami gaskavuođas. Čilge dát addá buori ja  konstruktiivva vejolašvuođaid go Norga sádde iežas dronnega dán rahpandilálašvuhtii, ja ahte Norgga stáhta ná  geige gieđa sámi servodahkii.

– Dronnet Sonja sáhkavuorru lei maid dakkár mii addá doaivaga ja mii movttiidahttá ja addá čuvggodanvejolašvuođaid. Dronnet lei oaidnán ja geahččan maid dat mearkkaša. Mun vázzen sudno maŋis go Sunna čájehii iežas dáidagiid. Mun vuhtten Dronnet Sonja lei lohkan hui olu sámi dáidaga birra, lei lohkan Anders Sunna dáidaga birra ja lei maid lohkan daid govaid birra. Son lei bures ráhkkanan ja sus lei alla dáiddafágalaš dássi. Dat lei maid hirbmat movttiidahtti, lohká Ánde Somby gii lei Venezias Anders Sunnai vuorasolbmo neavvumiin ja doarjjan. 

-Almmuhus-