Ođđa iskkadeapmi čájeha ahte 55.000 norgalaččas leat ruhtaspeallanváttisvuođat ja 122.000 olbmo rahčet dohko siektamis.
– Dát vuorjá min. Speallanváttisvuođat váikkuhit garrasit sidjiide geat spellet ja sin bearrašiidda, lohká Lotteriija- ja vuođđudusbearráigeahčču direktevra Atle Hamar.
Lotteriija- ja vuođđudusbearráigeahču ođđa iskan maid Bergena Universitehta lea bargan sin ovddas, čájeha ahte 55.000 norgalaččain leat speallanváttisvuođat. Lohku lea lassánan 34.000 olbmuin jagi 2015 rájes go ovddit iskkadeapmi dahkkui.
– Speallanváttisvuođat váikkuhit maiddái oapmahaččaide. Jus daid ge váldá mielde, de rehkenastit ahte iešguđetlágan speallanváttisvuođat váikkuhit 300.000-400.000 norgalaččaide. Oapmahaččat sáhttet oalát vealggáiduvvat vaikko eai leat speallan eai kruvnna ovddasge, lohká Lotteriijabearráigeahču direktevra Atle Hamar preassadieđáhusas.
Jagi 2015 ledje 88.000 muttolaš riskaspeallit, muhto lohku lea lassánan 122.000 olbmuid. Sii sáhttet fargga oažžut speallanváttisvuođaid. Bergena universitehta čilge leat olu sivat speallanváttisvuođaide, okta lea giehtatelefovdna mii lea dego kasino lupmas. Doppe olaha olles áiggi speallanbáikkiid. Speallandábit leat jorran vuollegis riskaspealus allariskaspealuide viđa jagis.
