Eai leat goassege ovdal ná ollu gelbbolaš ohcciide fállon oahpposajit go dán jagáš váldosisaváldimis. Eai ge leat goassege ná ollugat ožžon oahpposaji buohccedivššárohppui.
99 319 ohcci alitohppui leat ožžon fálaldaga oahpposadjái dán jagáš váldosisaváldimis.
Dat lea 1042 ohcci eambbo go diibmá, dieđiha Máhttodepartemeanta ovtta preassadieđáhusas.
Badjelaš 137 000 ohcciin leat 121 000 gelbbolaččat ja leat beassan unnimusat ovtta lohkansuorgái, čájehit ohcciidlogut Samordna opptakas (SO).
Dáin ohcciin lea gávcci logádas oassi ožžon fálaldaga oahpposadjái. Bealli sis leat beassan sisa sin vuosttaš válljemuššii.
– Eai leat goassege ovdal leamaš eambbo oahpposajit Norgga allaskuvllain ja universitehtain, ja eai leat goassege ovdal leamaš eambbo gelbbolaš ohccit geat ožžot saji. Dát leat hui buorit ođđasat. Mis lea stuora dárbu olbmuide geain lea alitoahppu Norggas, ja mun lean lihkolaš go mii sáhttit fállat eanet oahpposajiid go ovdal, dadjá dutkan- ja alitoahppoministar Iselin Nybø (Gurut) preassadieđáhusas.
Eambbosat háliidit šaddat buohccedivššárin
Árvosátnegáibádus buohccedivššárohppui, mii gáibida ahte ohccis ferte lea unnimusat 3 dárogielas ja matematihkas, ii oro baldimin boahttevaš buohccedivššáriid.
Vaikke vurdojuvvui stuora vuoládus gáibádusaid geažil, de leat dán jagáš váldosisaváldimis baicce ođđa olahusa ožžon.
Oktiibuot leat fállon 7255 oahpposaji ohcciide buohccedivššárohppui.
Dat lea lassáneapmi 3,7 proseanttain.
Dat boahtá das go dán jagi leat plánejuvvon 225 eambbo oahpposaji dán ohppui, máhttodepartemeantta mielde.
– Jagiin mat bohtet lea stuora dárbu olbmuide geain lea dearvvašvuođafágalaš oahppu, nu ahte dát logut leat positiivvalaččat, dadjá Nybø.
Eambbosat ožžot saji
Oahpaheaddjeohppui, masa mánáidgárdeoahpaheaddjeoahppu maid guoská, leat oktiibuot 11 377 ohcci ožžon oahpposaji.
Das lea lassáneapmi diimmá ektui, go dalle ledje 11 202 geaidda fállui oahpposadji.
Mánáidgárdeoahpaheaddjeohppui, vuođđoskuvlaoahpaheaddjeohppui 1.-7.ceahkis ja lektorohppui leat lassánan fállon oahpposajit, muhto lei smávva geahppáneapmi vuođđoskuvlaoahpaheaddjeohppui 5.-10. ceahkis ja fágaoahpaheaddjeohppui.
Oahpposurgi mas lea gaskaboddosaš lassáneapmi lea IKT-oahppu.
2018:i ektui leat fálaldagat lassánan 9,3 proseanttain.
Dasa lassin leamaš lassáneapmi nissonlogus, mii lea lassánan 26,8 proseanttas 28,8 prosentii.
