Gaskal 15- ja 25- jahkásaš nuoraid lohku, geat áigot váldit alitoahpu maŋŋel joatkkaskuvlla, lea njiedjan 7 proseanttačuoggáin maŋemus guovtt jagis.
– Mii oaidnit ahte njuolla manná boasttu guvlui go unnit nuorra olbmot háliidit gazzat eambbo oahpu. Vaikko vejolašvuohta oahppat eallenagi galgá nannejuvvot, de berre dat treanda jorggihit, dadjá Alitoahpu- ja gealbodirektoráhta direktevra, Sveinung Skule preassadieđáhusas.
Logut leat vižžon ođđa iskkadeamis, nuoraid oahppo- ja fidnoválljema birra maid direktoráhtta lea almmuhan.
Bealli vástideddjiin oaivvildit leat váttisin ipmirdit makkár bargguid sáhttá oažžut iešguđet oahpuin. Dasa lassin oaivvildit badjel bealli ahte lea váttis válljet rievttes oahpu.
Iskkadeapmi čájeha maid ahte dušše 29 proseantta leat duhtavaččat ráđđeaddimiin maid leat ožžon skuvllas alitoahpu válljema oktavuođas. 34 proseantta vástidit ahte eai leat duhtavaččat.
– Iskkadeapmi čájeha ahte badjel bealli háliidit hupmat bagadalliin báikkis. Kombinašuvdna buriin digitála reaidduin ja kvalitehta karrierabagadallamis skuvllain lea danne dehálaš veahkehan dihte nuoraid válljet riekta, dadjá Skule. ©NTB
