Norgga Máhttodepartemeanttas muitalit ahte gitta 8000 olbmo sáhttet oažžut dan fálaldaga čavčča rájes. Sámi oahpaheaddjit maid vuoruhuvvojit.
– Áŋgiruššat oahpaheddjiide lea deháleamos maid sáhttit bargat min nuoraid váste. Sii galget deaivat oahpaheddjiid geain lea relevánta ja ođasmahttojuvvon gelbbolašvuohta. Ráđđehus joatká dan dihte áŋgiruššama joatkkaoahpu olis, lohká máhttoministtar Kari Nessa Nordtun (Bargiidbellodat) preassadieđu bokte.
Odne guovvamánu 1. beaivi rahpasa ohcanportála mánáidgárde- ja skuvlaoahpaheddjiide geat háliidit váldit joatkkaoahpu boahtte jagi.
Ohcanáigemearri dievvá njukčamánu 1. beaivvi 2024.
Guokte miljárdda
Ráđđehus várre dasa measta guokte miljárdda ruvnno mas mánáidgárddi oahpaheddjiide lea várrejuvvon 393 miljovnna ruvdno ja skuvlaoahpaheddjiide ges 1,6 miljárdda ruvdno. Ráđđehusa rehketstuhka mielde dat addá vejolašvuođa váldit joatkkaoahpu 1850 mánáidgárddeoahpaheaddjái ja 5400 skuvlaoahpaheaddjái.
– Maŋimuš jagiid leat olu oahpaheaddjit, jođiheaddjit ja skuvlaeaiggádat vuoruhan joatkkaoahpuid, ja dainna mun lean hui ilus. Vejolašvuohta čiekŋudit ja ovdánahttit iežaset bargoeallimis lea okta dain deháleamos áššiin maid mii sáhttit dahkat rekruterema ja bisuhan dihtii oahpaheddjiid, ja fuolahit dan ahte mánáidgárddit ja skuvllat leat buorit bargosajit, lohká Nordtun.
Vuoruheamit
Skuvlaoahpaheaddjit geat ohcet joatkkaoahpuide matematihkas, eŋgelasgielas, dárogielas, sámegielas ja mearkagielas vuoruhuvvojit dán jagi maid.
Dasa lassin vuoruhuvvo gealbolokten erenoamášpedagogihkas. Unnimusat 800 mánáidgárdeoahpaheaddji ja oahpaheaddji ožžot fálaldaga nannet iežaset gelbbolašvuođa dán jagi.
Nu maiddái 600 oahpaheaddji praktihkalaš ja estehtalaš fágain galget oažžut vejolašvuođa loktet gealbbu.
