Ráđđehus evttoha juolludit 0,5 miljovnna kruvnna vai dat guokte stáhtalaš sámi joatkkaskuvllat Kárášjogas ja Guovdageainnus sáhttet fállat nuvttá borramuša ohppiide 2024 čavčča rájes.
Ráđđehusa vuoruheapmi galgá áimmahuššat ahte buot oahppit skuvllain galget beassat ainge oktii beaivái borrat dearvvašlaš borramuša. Dutkan čájeha ahte skuvlaborramuš sáhttá njulget sosiála erohusaid mat gusket borramuššii ja dearvvašvuhtii.
– Lean hui ilus go boahtte čavčča rájes oažžugohtet sámi joatkkaskuvllaid oahppit Kárášjogas ja Guovdageainnus nuvttá borramuša skuvllas. Bargiidbellodaga (Bb) sámediggejoavkku Ronny Wilhelmsen lea áŋgiruššan ahte dat oahppit maid ožžot nuvttá borramuša joatkkaskuvllas. Lean ilus go menestuvai dan dahkat boahtte jagi stáhtabušeahtas, lohká máhttoministtar Tonje Brenna (Bb) preassadieđáhusas.
Ráđđehusa julggaštusas čállet Bargiidbellodat ja Guovddášbellodat ahte galgá ásahuvvot beaivválaš, dearvvašlaš ja dábálaš skuvlaborramuš maid skuvllat ieža sáhttet fuolahit.
– Romssa ja Finnmárkku fylkkaráđi jođiheaddji Kristina Torbergsen (Bb) leamaš njunnošis ásahit nuvttá borramuša skuvllain miehtá fylkka. Go stáhta lea dan guokte sámi joatkkaskuvlla eaiggát, de lea ilus go mii sáhttit čuovvolit fylkkaráđi buori politihka, lohká Brenna.
