Olbmuin, geain lea aldnabuozalmas, lea golmma geardde stuorát vejolašvuohta dárbbašit intensiivadivššu jus sidjiide njoammu korona, čájehuvvo ođđa dutkosis.
Badjel 5000 pasieantta, geain lea koronanjoammun, leat searvan dutkosii, mii čájeha ahte pasieanttat, geain leat aldnabuozalmasvuohta periodonitt, lea 3,5 geardde stuorát vejolašvuohta geavvat intensiivadikšui, 4,5 geardde stuorát vejolašvuohta dárbbašit ventilahtora ja goasii ovcce geardde stuorát vejolašvuohta jápmit dávddain, buohtastahtton singuin geain ii leat aldnabuozalmasvuohta, dieđiha Norgga bátnedoavttersearvi.
Dutkkus lea almmuhuvvon áigečállogis «Journal of Clinical Periodontology», man almmuha Eurohpá bátnedoavtterorganisašuvdna European Federation of Periodontology (EFP).
Anne M. Gussgard, guhte lea periodontiija spesialista ja UiT klinihkalaš odontologiija instituhtas vuosttašamanueansa, ii leat hirpmastuvvan dainna gávdnosiin.
– Jus lea kronalaš vuolši njálbmeguovnnjis, de váikkuha dat rupmašii. Dat váikkuha olles immunasuodjalussii, nu ahte lea maid hearki eará buozalmasvuođaide. Jus ovdamearkka dihte lea eará buozalmasvuohta, nu go diabetes, de sáhttá váttis áimmahuššat daid buozalmasvuođaid, dadjá son NRK:i.
(©NTB)
