Man láhkai dádjadit dálá nuorat kvena, sámi ja dáža identitehta gaskkas? UiT – Norgga árktalaš universitehtamusea bovde nuoraid háleštit dáruiduhttima birra ja iežaset identitehta birra.
Dálá 20-jahkásaš sápmelaččat ja kvenat leat sin maŋisboahttit geat vásihedje dáruiduhttima vearrámus áiggi. Sii leat bajásšaddan áiggis goas almmolaš ságastallamis deattuhuvvo man dehálaš lea váldit vára iežas kulturárbbis, áiggis goas olu nuorat ohcalit áŋgirit dan mii oktii lei.
UiT – Norgga árktalaš universitehtamusea lea bovden poehta ja girječálli M. Seppola Simonsen, journalistta ja aktivistta Dávvet Bruun-Solbakk, dáiddára Åsne Kummeneje Mellem ja studeantta, badjeolbmo ja neavttára Aili Kristine Eira muitalit iežaset čanastumiid kvena- ja sámevuhtii. Dás muitalit maid sii jurddašit maid sidjiide mearkkaša leat nuorra sápmelaš ja kvena.
– Kultuvrralaš gullevašvuohta lea dehálaš oassi dán njealljása identitehtas. Seammás go sii suokkardit mii lea leahkit ođđaáigásaš sápmelaš dahje kvena, de fertejit maid vuhtii váldit dan kollektiivva váttes historjjá čielggademiin. Šaddá hui miellagiddevaš gullat sin jurdagiid ja vásáhusaid, lohká UiT – Norgga árktalaš universitehtamusea gaskkustanneavvu ja ságastallanjođiheaddji Siri Asphaug Holmøy preassadieđáhusas.
Álo amas?
Vuolggasadji lea musea čájáhus «Alltid en fremmed». Čájáhus muitala Davvi-Norgga skuvlainternáhtaid birra. Olu internáhtamánát muitalit sii dovde iežaset oarbbisin. Lágideaddjit jerret gávdno go dát oarbbis dovdu ain nuorra sámiid ja kvenaid gaskkas.
– Naba dál, mo lea dássádallat dáža, sámi ja kvena gaskkas. Navdit Dávvehis, Ailis, Åsnes ja M. Seppolas leat vásáhusat dan birra maid guldaleaddjit háliidit gullat, lohká Asphaug Holmøy.
UiT – Norgga árktalaš universitehtamusea historihkkár ja čájáhusa «Alltid en fremmed» fágalaš ovddasvástideaddji, Ketil Zachariassen, ja Anita Salamonsen gii lea Nord (UiT) guovllu mánáid ja nuoraid diehtoguovddáš ja Stavanger Universitehta sosiologa álggaheaba ságastallama museas skábmamánu 22. beaivvi eahkedis.
Musihkain guoimmuha Máret Áile Gaup Beaska, gii lea dovddus Sámi Grand Prix 2023.
