Ohppiid mobiilatelefovdna geavaheapmi diimmus lea muosehuhtti, muhtimiid atnet dušše telefovnna veahkkeneavvun. Mo galggašedje njuolggadusat ohppiid mielas?
Eanas oahppit dadjet manná bures jus ii leat lohpi telefovnnain skuvllas, muhto go lea dakkár bihtát mat eai nu suohttas, de gal galggašii beassat guldalit juoba musihka ge.
Oainnut dán artihkkalis leat dušše guovtti luohkás Oslos, dalle ii soaitte seamma eará skuvllain. Dát artihkal lea vižžon barnevakten.no siiddus neahtas.
Lássejit skábii
Oahpaheaddjit juohke ládje váldet ja geavahit daid njuolggadusaid mat leat.
Muhtimat eai beroš jus oahppi lea telefovnnain ja muhtumat ges beroštit hui ollu.
Muhtin oahpaheaddjit lássejit ohppiid telefovnnaid skábii.
Oahppit oaivvildit ahte buot oahpaheddjiin galggašedje juste seamma lágan njuolggadusat. Muhtimat dadjet ahte oččošedje guldalit musihka, earáid mielas fas ii.
– Mii boahtit mánáidskuvllas ja doppe ii lean lohpi telefovnnain, go álggiimet nuoraid skuvlii, de lei veahá eambbo friddjavuohta, ja go de álggiimet 10. luohkái, de muhtin oahpaheaddjit válde ja lássejedje telefovnnaid skábii.
– Friddjabottuin goit ferte oažžut lobi telefovnnain, muđui lea dat sisabahkken nuoraid priváhta eallimii.
Guovdageainnus ja Kárášjogas maid gielddus
Sihke Kárášjoga mánáid- ja nuoraidskuvllas ja Guovdageainnu nuoraidskuvllas lea maid gielddus geavahit mátketelefuvnna oahpahusa áiggis.
Kárášjogas lohke čakčat vásihan buriid bohtosiid dán geažil ja Guovdageainnu nuoraidskuvlla rektor Ellen J. Sara Eira lei ges nu duhtavaš dáinna ahte ávžžuhii buot skuvllaid čuovvolit dán.
Čálašit earáiguin
Nuorat eai leat ovttaoaivilis, muhtimat oaivvildit ahte galggašedje oažžut telefovnna geavahit diimmuin ja nuppiid mielas fas ii leat dát dohkálaš.
– Telefovdna galggašii eret, nuorat eai nagot konsentreret ja ii telefovdna dárbbahuvvo oahpahusas.
– Mun anán telefovnna ja mus leat buorit árvosánit, eai buohkat geat atnet telefovnna oaččo heajos árvosániid.
– Eanemusat atnet čálašit earáiguin dan seamma luohkás, jus ii leat nu somás oahpaheaddji ja diibmu, ja makkár biktasat leat oahpaheaddjis.
Ii goasse jávkka
Telefovnnain sáhtát govvet ja njuolggadusain čuožžu ahte ii leat lohpi govvet, muhto olusat govvejit ja filbmejit liikká earáid ja sáddejit earáide dahje bidjet nehttii dalle go lea riegádanbeaivi.
Muhtimiid mielas dat ii heive ja lea unohas. Njuolggosátta ii jávkka goassege eret neahtas albma ládje, ja dat filbma sáhttá gávdnot vaikke man guhká neahtas.
Čállán: Sara Alice Gaup
