Guovdageainnu nuoraidskuvlla rektor Ellen J. Sara Eira ávžžuha buot skuvllaid čuovvolit sin ja Kárášjoga skuvlla, gos leat gieldan ohppiid geavaheames mátketelefuvnnaid oahpahusdiimmuin.
Guovdageainnu nuoraidskuvlla rektor Ellen J. Sara Eira ávžžuha buot skuvllaid čuovvolit sin ja Kárášjoga skuvlla, gos leat gieldan ohppiid geavaheames mátketelefuvnnaid oahpahusdiimmuin.
– Mii álggaheimmet dán ortnega ovddit jagi, ja dat lea doaibman dainna lágiin ahte oahppit bidjet mátketelefuvnnaid kássaid sisa go bohtet luohkkálatnjii, ja ožžot daid fas friddjagoartil botta atnit, muitala Guovdageainnu nuoraidskuvlla rektor Ellen J. Sara Eira.
Buohkat vuoitán dáinna
Guovdageainnu rektor muitala iežaset maid álggahan dákkár ortnega jo ovddit jagi.
– Ja ortnet lea doaibman hui bures, mii vásihat stuorra erohusa ja buohkat leat dáinna vuoitán, muitala rektor.
Eastada givssideami ja negatiiva vuoiŋŋa
Son muitala ahte sii álggahedje dán ortnega sihke danne go mátketelefongeavaheapmi lávii muosehuhttit ohppiid ja vai eastadit neahttagivssideami.
– Mátketelefongeavaheapmi muosehuhttá vuosttažettiin dan oahppi guhte geavaha dan go de ii čuovo oahpahusa doarvái, ja de sáhttá earáid maid muosehuhttit jus čuodjá, muitala son.
Rektor lohká maid ahte ovdal go gilde telefongeavaheami, de lávii sáhttit leat nággu ohppiid ja oahpaheddjiid gaskkas telefongeavaheami birra.
– Dat maid lávii dagahit negatiiva vuoiŋŋa, lohká son ja muitala iežaset sádden gildosa gulaskuddamii váhnenráđđái ja ii oktage váhnen leat moaitán ortnega.
– Ja go eai ane mátketelefuvnna oahpahusdiimmuin de sáhttá eastadit neahttamobbema ja mii maid sáhttit buorebut dadjat ahte neahttamobben ii dáhpáhuva skuvllas, lohká rektor.
