Iđut-lágádus almmuha dán jagi goalmmát Š-bláđi. Nuoraidmagasiidna čállá máŋga nuorra taleantta birra.
Girkonjárgga gánda Ailo Johansen (13) vuodjá motocrossa. Čakčamánus son šattai Davvi-Norgga meašttirin MX85-luohkás (13–15-jahkásaččaide). Son beasai fárrolaga guvttiin eará juniorgánddain Norgga juniorriikkajoavkku ovddastit mohtorcrossagilvvus Coupe de l’Avenir Belgias. Ailo ja su guokte joavkoskihpára šadde guđádin.
Kárášjoga nieida Ella Celine Schanche Dalseng (14) gilvalii Norggameašttirgilvvuin heastadápmamis Sarpsborgas čakčamánus. Ella Celine ja su guokte joavkoskihpára šadde goalmmádin.
Máret Áile Gaup Beaska (19) orru Romssas, muhto sus lea gullevašvuohta Detnui, Rivttáide ja Guovdageidnui. Son bođii nubbin dán jagi Sámi Grand Prixas lávlagiin «Ráhkis hoavda».
Š lea maid fitnan Riddu Riđus ja Márkomeanus guorahallamin dán jagi festiválamote ja gáktemote. Nuoraidmagasiinna divššár Ánne-Hedvig lea vástidan nuoraid gažaldagaid.
Š almmuhuvvo njealje geardde jahkái ja dán jagi maŋimuš nummir ilbmá juovlamánus. Š-bláđđi lea nuvttá nuoraid várás geain lea sámegiella skuvlafágan Norggas. Bláđđi sáddejuvvo 1613 nurrii 91 skuvllas.
