Dán jagi maŋimuš Š-bláđđi lea ilbman.
Iđut-lágádus lea almmuhan 2023 maŋimuš Š nuoraidmagasiinna, ja das deaivvadat nuorra aktivisttaiguin, neavttáriiguin ja giellaberošteddjiin.
Guovdageaidnulaš Mihkkal Hætta (23) lea filbmadahkki ja dán jagi Riddu Riđu nuorra dáiddár. Mannan čavčča lávostalai son Stuoradikki olggobealde čalmmustahttin dihte Fovse-ášši. Š lea deaivvadan suinna ja eará miellačájeheddjiiguin Oslos.
Nuoraidmagasiinnas oahpásmuvat maid nuorra neavttáriiguin geain leat váldorollat Husky nammasaš TV-ráiddus: Sara Felicia Rasmus Labba (14), Mihkku Johannes Albin Wolf Ballovara (13) ja Leon Alseth Valio (14).
Are Markku Tjihkkom (21) lea Ájluovttas eret ja jorgala girjjiid julevsámegillii. 18-jahkásažžan son vuođđudii girjelágádusa. Son orru dál Oslos gos son studere lingvistihka.
Muoiddut ja motat: gahpirat. Nuoraidmagasiinna divššár Ánne-Hedvig lea vástidan nuoraid gažaldagaid.
Š almmuhuvvo njelljii jahkái ja sáddejuvvo 1622 nurrii 92 skuvllas. Š lea nuvttá Norgga skuvlanuoraide geain lea sámegiella skuvlafágan. Boahtte nummir almmuhuvvo guovvamánus.
