Jori birra lea girječálli čállán guovtti girjjis. Dál beassá lohkat goalmmát girjji Jori birra.
Jon Einar Eira almmuhii iežas vuosttaš mánáid- ja nuoraidgirjji Jori Jeaggejogas jagi 2002. Nubbi girji ráiddus mii maid lea Jori birra, almmuhuvvui 2011:s, Jeaggejogas mearariikii.
Dál sus lea ilbman goalmmát girji, dieđiha Iđut preassadieđáhusas.
Jori internáhtas
Eira almmuha dál iežas goalmmát girjji dán ráiddus, Jori internáhtas.
Jori ja su olbmát orrot internáhtas giđđat ja čakčat. Doppe leat sis sihke suohtas ja váivves vásáhusat. Sii fertejit finadit doaktára ja bátnedoaktára luhtte, ja dat sáhttá leat oalle issoras. Internáhtas leat mánát maid gullan ártegis jienaid ja oaidnán juoidá, maid eai dieđe mii dat lea. Muhtin beaivvi gádju Jori máná heavvaneamis, ja dan ovddas oažžu son rámi ja bálkkašumi. Juovlamánus olle Jeaggejoga siida dálveorohahkii, ja mánát besset fárret ruoktot. Muhto Jori buoremus olmmái, su heargi Čuvvolis Čuoivvat, lea láhppon. Jori vuolgá ohcat hearggis, muhto de dálkkáska. Sevdnjes áiggi garra dálkki siste lea bahá láhppot …
