Emma čállá beaivegirjji, son lea ráhkásmuvvan, son ii dieđe maid son háliida dán máilmmis, ja sus lea skihpár gii gielista ja beahttá.
Girječálli Hanne-Sofie Suongir lea čállán nuoraidgirjji Emma dilemma, mas beassat lohkat 14-jahkásaš Emma birra guhte morašta. Emma váillaha iežas uhcaoappáža gii jámii fáhkka, son šattai dušše njealje jagi boarisin.
– Mo sáhttá Ipmil dahje universa diktit diekkár váivviid dáhpáhuvvat, manin, manin? jearrá Emma.
Girjji lea čállán Hanne-Sofie Suongir. Son almmuhii iežas vuosttaš mánáidgirjji 2020:s, Elle – guohcamanit poastakantuvrras. Nina Marie Andersen lea sárgon girjji govaid. Iđut lea almmuhan girji, ja Sámediggi lea ruhtadan almmuheami.