Guđa jagi geahčen bohtet váilut 200 oahpaheaddji Finnmárkkus. Dál bidjá Romssa universitehta johtui ođđa lágan oahpu, mainna jáhkket nagodit oažžut eambbosiid álgit oahpaheaddjiohppui.
Guđa jagi geahčen bohtet váilut 200 oahpaheaddji Finnmárkkus. Dál bidjá Romssa universitehta johtui ođđa lágan oahpu, mainna jáhkket nagodit oažžut eambbosiid álgit oahpaheaddjiohppui.
Boahtte čavcca rivdet oahpaheaddjioahput viđa jagi oahppun miehtá riikka, Finnmárkkus lea nu leamaš 2014 rájes.
Romssa universitehta áigu bidjat návccaid oahpaheaddjistudeanttaid oččodit Finnmárkui.
Stuora sátsen
Preassadieđáhusas muitala instituhttajođiheaddji Tore Nesheim ahte universitehta áigu sihke Áltái, Hammerfestii, Girkonjárgii ja Ráisii oažžut oahpaheaddjioahpu.
Romssa universitehta lea ovttas Nuorta-Finnmárkku regiovdnaráđiin, Oahpahusservviin ja Mátta-Várjjat gielddain dán almmuhan.
Nuorta-Finnmárkku regiovdnaráđđi lea guhka ohcalan dákkár áŋgiruššama, ja leat dál hui duhtavaččat.
Regiovdnaráđi jođiheaddji Robert Jensen lohka ahte sis lea dál bargu ovddasguvlui, go fertejit álgit rekrutteret studeanttaid.
– Jáhkán suohkanat fertejit stipeanddaiguin oččodit studeanttaid, Girkonjárgii ja Áltái. Mis ferte ollislaš áŋgiruššan vai oažžut buohkaid mielde geat beroštit váldit oahpaheaddjioahpu, lohká Jensen.
Fargga váilot olu ohpaheaddjit
Oahppu lea nu heivehuvvon ahte studeanttat sáhttet orrut iežaset ruovttubáikkiin ja oassálastit čoahkkanemiide Álttás 4-5 háve jahkai, ja neahttaoahpahusa čuovvut 4-5 háve jahkái.
Go ii leat oahpahus de sáhttet bargat studeanttajoavkkuin, gos ožžot bagadeami neahta bokte.
15 proseanta Finnmárkku vuođđoskuvllaoahpaheddjiin leat badjel 60 jagi. Dat dahká gaskkal 150 ja 200 oahpaheaddji.
Finnmárkkus lassánit maid oahpaheaddjit geat leat badjel 55 jagi boarrás, vaikko muđui riikkas dat lohku njiedjá.
