Dan ávvuda Sámi oahpahusfierpmádat (NetSam), fágaseminárain boahtte vahku, čakčamánu 14. ja 15. beaivvi Álttás.
Fágasemináras guoskkahit dehálaš fáttáid sámi oahpahusas, sihke logaldallamiid ja maiddái panelaságastallama bokte, mas jearrat mii lea sámi skuvllaid boahtteáigi? Fágaseminárii leat bovdejuvvon oahpaheaddjit, skuvlajođiheaddjit/-eaiggádat ja eará berošteaddjit. – Mun lean hui ilus go Netsam lea doaibman 10 jagi ja go lea beassan čohkket sámi oahpaheddjiid ja ovddidit dehálaš áššiid sámi oahpahussii buorrin. Jagiid mielde lea NetSam veahkehan gelbbolašvuođa loktemiin fágačoagganemiid bokte maid lea lágidan ja lea searvan sámi oahpaheddjiid jietnan almmolaš mearrádusvuogádagas. Dattetge lea ain ollu maid NetSam galggašii doaimmahit, danne áigut 10 jagi fágasemináras panelaságastallama bokte juste fal jearrat mii sámi skuvllaid boahtteáigi lea. Dainna lágiin geahčastit ovddos ja eanet doaimmaide, lohká NetSam jođiheaddji Inger Anne Gaup preassadieđu bokte.
Mii lea NetSam?
NetSam lea fierpmádat vuosttažettiin sámi oahpaheddjiid váste ja das leat birrasii 220 miellahtu. Fierpmádaga jođiha sierra stivra mii čuovvola fierpmádaga doaibmaplána sierra doaimmaiguin. Netsama čállingoddi lea Sámi allaskuvlla Nationála Sámi lohkanguovddážis.
