11 proseantta eai vuolgge gosage geasseluomus dán jagi. Dat lea measta beali eambbo go diibmá.
– Leat mearkkašahtti rievdadusat diimmá rájes. Haddelassáneamit váikkuhit garrasit geasi mátkkoštanplánaid. Olbmuin lea heajut ráđđi. Seammás go mátkkoštanmiella diimmá geasi lei stuorát pandemiija maŋŋel, dadjá Frende Forsikring gulahallanhoavda Heidi Tofterå Slettemoen preassadieđáhusas.
Dákko leat eatnasat dahkan rievdadusaid
Olu fylkkain leat dán jagi vel eanebut go diibmá geat eai vuolgge lupmui. Stuorámus rievdan lea Romssas ja Finnmárkkus (12 % eanebut eai vuolgge geasselupmui), Nordlánddas (11 %), Vestfold ja Telemark (9 %) ja Innlandet (9 %).
Vuordde luomuin, jus sáhtát
Ekonomalaččat sáhttá leat buorre maŋidit luopmobeivviid.
– Hui heajos ruhtaárvu, alla reanttut ja haddelassáneapmi girdiin ja hoteallain sis- ja olgoriikkas dahká ahte sáhttá seastit stuora supmiid jus ii vuolgge mátkkoštit divraseamos mánuid dál geasset, dadjá son.
Frende-iskkadeapmi čájeha ahte olu norgalaččat leat rievdadan iežaset mátkkoštanplánaid, juste dan dihte.
– Juohke goalmmát vástida ahte sii mátkkoštit unnit geasset divruma geažil. Ovcci proseantta eai oba vuolgge ge olgoriikii nu go álggos ledje meinen, dadjá Slettemoen.
