Eatnašat dihtet Loatnakássa fállá sihke stipeandda ja loana sidjiide geat váldet oahpu. Muhto dihtet go ahte eanaš oassi oahppoloanas aiddooahppan oahpaheddjiin sáhttá sihkastuvvot?
Oktasaš sisaváldin (samordnet opptak) ohcanáigemearri lahkona. Ráđđehus almmuhii strategiija háhkat olbmuid oahpaheaddjeohppui ja oahpaheaddjefidnui 2024–2030.
Ráđđehus háliida joatkit oahppoloana sihkastanortnegiin vai eanet olbmot váldet oahpaheaddjeoahpu ja barget oahpaheaddjin. Jus árvvoštalat váldit oahpaheaddjeoahpu, de lea vuogas diehtit ahte eanaš oassi du oahppoloanas sáhttá sihkastuvvot go gearggat oahpuin.
Gitta 361 000 kruvnnain
Loatnakássa ulbmil lea sihkkarastit ahte servodagas ja bargoeallimis lea dehálaš áššáigullevaš gelbbolašvuohta. Norga dárbbaša oahpaheddjiid ja dan dihtii leat Loatnakássas ortnegat mat addet dákkár vejolašvuođa aiddooahppan oahpaheddjiide. Man olu, vuolgá das maid leat studeren ja gos bargagoađát, dieđiha Loatnakássa gulahallandirektevra Anette Bjerke preassadieđáhusas.
Jus leat váldán vihtta jagi vuođđoskuvlaoahpaheaddjeoahpu 1.–7. luohkkái dábálaš áiggis ja barggat vuođđoskuvlaoahpaheaddjin, de sáhttá du oahppoloanas sihkastuvvot 106 000 kruvdna. Jus válddát erenoamáš oahpu reálafágas, amasgielas, sámegielas dahje kvenagielas, de sáhttá du oahppoloatna geahppánit velá 50 000 kruvnnain.
Jus bargagoađát oahpaheaddjin Davvi-Norggas, de sáhttá velá eanet du oahppaloatna geahppánit, oktiibuot 211 000 kruvnna Davvi-Norggas, ja jus bargagoađát doaibmaguovllus mii lea Finnmárkkus dahje dihto osiin Davvi-Romssas, de sáhttá loatna geahppánit velá 50 000 kruvnnain. Dás lea dus vejolašvuohta oažžut gitta 361 000 kruvnna sihkastuvvot oahppoloanas golmma jagis.
Fuomáš, muhtun ortnegiin lea ohcanáigemearri hui fargga maŋŋá go gearggat oahpuin, ále vuordde ohcamiin.
