NVE rávve rievdadit huksenteknihkalaš njuolggadusa (TEK 17) nu ahte gielddat besset geavahit nu gohčoduvvon organisatuvrralaš doaimmaid sihkkarastit ođđa huksemiid dulvvi vuostá.
Norgga čázádat- ja energiijadirektoráhta NVE rávve ođđa raporttas ahte huksenteknihkalaš njuolggadusa (TEK 17) berrešii rievdadit vai rahpá vejolašvuođa bidjat johtui organisatuvrralaš doaimma sihkkarastit dulvvi vuostá. Dál lea nu ahte ođđa huksemat galget sihkkarastojuvvot bistevaččat nu ahte sáhttet dustet 200-jagáš dulvvi. Dát doaimmat leat dávjá viidát ja hirbmat divrasat mat eai váldde vuhtii luonddu- ja eatnama várjaleami, eaige ássiid loaktima. Jus sáhtášii addit lobi dasa ahte osiin dulvesihkkarastindoaimmain sáhtášii geavahit ráhkkanusaid maid sáhttá eret váldit go dulvevárra lea nohkan, dahje diktit ráhkadit uvssaid maid sáhtašii giehtafámuin dahje automáhtalaččat giddet go lea dulvevárra, de geahpedivčče dulvesihkkarastindoaimmaid heajos beliid mealgat.
– Dál eai beasa gielddat ráhkadit eará go bistevaš dulvesihkkarastindoaimmaid. Dát doaimmat leat dávjá hirbmat divrasat ja čuhcet sihke lundui ja báikeolbmuid loaktimii. Mii rávvet danin ahte gielddat oččošedje dákkár dulveeastadanráhkkanusaid maid ceggejit go lea dulvevárra, lohká NVE čázádat- ja energiijadirektevra Kjetil Lund preassadieđáhusas.
