Norgga čázádaga- ja elrávdnjedireketoráhta (NVE) analysat čájehit ahte elrávdnjedilli lea buorre dál ovdal dálvvi, ja NVE dieđihit eai oainne ahte šaddá energiijavátnivuohta dán dálvvi.
– NVE árvvoštallá energiijadili dađistaga, ja dál ovdal dálvvi lea energiijadilli buorre. Dattetge vuordit mii divrasat elrávnnji go masa mii leat ovdal hárjánan. Leat olu áššit mat váikkuhit elrávdnjehattiide dán dálvvi, earret eará dálvi ja gássahaddi, lohká NVE energiija- ja konsešuvdnaossodaga direktevra Inga Nordberg preassadieđáhusas.
Buollašiid dihtii lea elrávdnjegeavaheapmi ligget dáluid, lassánan. Seammás leamaš uhcán arvi gaskamearalaččat dán áigodagas. Go energiija lea divrasat kránnjáriikkain, de vuovdá Norga elrávdnji sidjiide.
Geavaheaddjit eai dárbbaš ballat ahte energiija unnu
Maŋimuš mánu buollašiid dihtii lea čáhcebuođuin birrasiid lahki čáhci, muhto lea ain buorre resursadilli, vaikko olu elrávdnji lea buvttaduvvon maŋimuš mánuid. Analysa ii čájet ahte geavaheaddjit dárbbašit ballat ahte energiija unnu. Nordberg muitala bieggaturbiinnaid buvttadeapmi lea lassánan dálvviid ja ovttasbargu eará riikkaiguin lea buoret go moaddelogi jagi dás ovdalis. Norggas lea gaskamearálaš jagis birrasiid 20 TWh eanet energiijabuvttadeapmi go energiijageavaheapmi, čállet preassadieđáhusas.
Elrávdnjedoarjaga dihtii eai čuoza dat divrras elrávdnji nu olu go diibmá. Čakčamánu 1. beaivvi rájes rehkenastigohte doarjaga tiimmuid mielde, iige mánuid mielde nu mo ovdal. Jus elrávdnjehaddi lea divrasat go 70 evrre/kWh (earret momssa), de oažžu kunddar doarjaga 90 proseantta dan ruhtasupmi ovddas mii lea badjel 70 øre/kWh.
Doppe gos mákset momssa elrávnnji ovddas, ožžot 25 proseantta eambbo. Ráđđehus lea evttohan lasihit doarjaga 70 evrres 73 evrii 2024 ođđajagemánu 1. beaivvi rájes.
