Nissonolmmoš jámii biilalihkohisvuođas odne Dielddanuori šaldi bokte. Lei biila ja guorbmebiila mat gárte lihkohisvuhtii.
Lei okta biila ja okta guorbmebiila mat gárte lihkohisvuhtii Skuvsvika nammasaš báikki bokte. Politiijat Romssas dieđihit ahte njealjátlotjahkásaš nissonolmmoš orru Dielddanuori suohkanis ja su lagamuččat leat ožžon dieđu lihkohisvuođa birra.
– Mis eai leat dieđut mii lea geavvan lihkohisvuođadáhpáhusas earret go ahte lei deaivvadanlihkohisvuohta. Mii fertet jearahit guorbmebiilavuoddji ja dahkat dutkamušaid báikkis, dadjá operašuvdnajođiheaddji Per Arve Aas NTB:i.
Guorbmebiilavuoddji ii roasmmehuvvan fysalaččat lihkohisvuođas, muhto sutnje lea garrasit čuohcan mo lihkohisvuohta gárttai, dieđihit politiijat.
– Son váldojuvvo váras, dadjá Aas.
Geaidnu belohahkii gitta
Geaidnu giddejuvvui maŋŋel lihkohisvuođa, politiijat ožžo dieđu lihkohisvuođa birra sullii dii. 08.30, ja 11-áigge rahpe sii ovtta fealtta geainnus vuoi trafihkka beasai meattildit.
– Mii eat dieđe guhká mii fertet doallat dan ovtta fealtta geainnus gitta, lohká Aas.
Politiijat dieđihedje álggos ahte ledje guokte iešguđetge lihkohisvuođa, muhto maŋŋel go bohte báikái de lei čielggas ahte lei ovtta lihkohisvuođas sáhka.
(©NTB)
