Njealje olbmo juohke logi olbmos leat gávdnan biilla roakčanan ja bahádahkki lea mannan.
Vuossárgga álgá «Black Week», ja lea ge okta dain vearámus vahkuin goas olusiin roakčana biilla, čállá Trygg Forsikringer. Iskosis maid dáhkádus lea čađahan vástidii 38 proseantta biilavuddjiin ahte sii leat vásihan gávdnan biilla roakčanan bisánanšiljus ja bahádahkki lea guođđán báiki.
– Beare olusat dahket iežaset bahádahkkin maŋŋá go leat vuodján nuppi biilla njeaiga bisánanšiljus, dadjá Trygg dáhkádus gulahallanráđđeaddi Torbjørn Brandeggen.
Brandeggen muitala ahte leat eanaš almmáiolbmot geat leat sivalaččat vahágiin, oktiibuot 70 dieđihuvvon vahágiin leamašan almmáiolmmoš biilavuoddji. Stuorámus lihkohisvuođabeaivvi lea bearjadaga «Black Weekas».
– Seammás oaidnit ahte 50–64 -jahkásaččat leat njunnošis vahátstatistihkas, lohká Torbjørn Brandeggen.
11 437 biilavahága
Diibmá dieđihuvvojedje «Black Week» oktavuođas dáhkádusfitnodagaide oktiibuot 2 266 vahága, mas duogáš lei ahte nubbi biila lea vuodján nuppi biilla njeaiga bisánanšiljus. Ii goassege ovdal leat leamašan nu alla lohku, čájehit logut Finans Norges. Oktiibuot dieđihuvvojedje 11 437 biilavahága diibmá dan vahkus.