-Almmuhus-
-Almmuhus-

Nuoraid muita­lusat šaddet válga­sáhkan skuvllas

-

-

Olu nuorat vásihit ahte politihkka ii guoskka sidjiide. Dál leat NRK ja Tenk mannan oktii ráhkkanahttit dán ulbmiljoavkku suohkan- ja fylkkadiggeválggaide. Nuoraid muitalusat šaddet sierra oahpahussan nuoraid- ja joatkkaskuvllain miehtá riikka.

Tenk, mii lea faktisk.no skuvlaossodat, ovdánahttet oahpahusresurssaid mat geavahuvvojit vuođđoskuvllas ja joatkkaskuvllas. NRK ja Tenk ovttasbarget dál válgga oktavuođas.

Prošeavtta namma lea «Eallin dál». 

– «Eallin dál» addá konkrehta ja lagas ovdamearkkaid mat sáhttet hukset šalddi daid gaskii maid nuorat deaividit skuvllas, medias ja iežaset árgabeaivvis. Dainna ovttasbargguin NRK:in oažžut mii vejolašvuođa bidjat fokusa dasa mo báikkálaš politihkka sáhttá váikkuhit ovttaskas olbmo eallima, ja čatnat dan gáldodiđolašvuhtii ja kritihkalaš mediageavaheapmái, dadjá Tenk fágavásttolaš, Marte Foldvik-Høgås preassadieđáhusas.

Artihkalráidu NRK:s

Oahpahuslágideamis lea seamma namma go NRK-prošeavttas. NRK journalisttat leat hupman nuorra jienasteddjiiguin, mii sidjiide guoská ja mas sii beroštit válggaid oktavuođas.

– Olu nuorat geaiguin mii leat hupman lohket ahte politihkka ii guoskka sidjiide. Dan čájehit maid Statistalaš Guovddašdoaimmahaga logut mannan suohkanválggas. Dušše 47 proseantta sis geat nuppes besse jienastit, jienastedje dalle. Danne leat mii hupman nuorra olbmuiguin dan birra mas sii beroštit. Sii namuhit earret eará oahpu, dearvvašvuođa, bearašoktavuođaid, ráhkisvuođa ja olu eambbo. Mii sávvat ahte sin muitalusat boktet nuoraid beroštumi politihkkii, dadjá NRK Oslo ja Vikena almmuhanhoavda, Anne Karin Pessl-Kleiven. 

Dán artihkalráiddus besset geahččit oahpásnuvvat earret eará Emiliein (23). Son lea okta logi nuorra olbmos geainna NRK lea hupman dán prošeavtta oktavuođas.

– Mun lean álo leamaš ruoksat, dassái ieš buohccájin. Olgeš-bealli áŋgiruššet eambbo priváhta dearvvašvuođas. Mun lean geahččalan guktuid, ja dat priváhta lea buoret. Mun dovddan ahte lean gasku, dadjá Emilie.

Unnán válgaoassálastit sisafárrejeddjiid gaskkas

Sisafárrejeddjiid gaskkas lea válgaoassálastin vel unnit. Sin gaskkas geat leat Norgga stáhtaborgárat lea 40 proseantta geat jienastit, ja 30 proseantta fas sin gaskkas geat leat olgoriikka stáhtaborgárat.

Sisafárrejeddjiid mánát leat maid unnit go Norgga váhnemiid mánát.

– Mii áigut maid danne čájehit máŋggabealatvuođa das maid mii bargat, maid dán prošeavttas. Mii galgat speadjalastit álbmoga, vai min sisdoallu lea áigeguovdil buohkaide, muitala Pessl-Kleiven.

Sihke NRK artihkalráidu ja Tenk oahpahus almmuhuvvojit borgemánu 10. beaivvi.

-Almmuhus-