Muohtaboltunvuoddji šaddá vuodjit ja doallat rabas geainnuid ija beaivvi.
Muohtaboltunvuoddji šaddá vuodjit ja doallat rabas geainnuid ija beaivvi.
Finnmárkkus lea dál hirbmat garrá dálkkit, ja máŋgga sajis leat geainnut gitta, dahje leat ráidovuodjimat, dieđihit Stáhta Geaidnodoaimmahat.
Ija beaivvi vuodjit
Kárášjohkalaš Kim Halgeir Berg guhte vuodjá muohtaboltunbiillain Ávanuoris, Muosát suohkanis, muitala iežas vuodján čađat ihkku njealji rájes.
– Dáppe lea dálki nu ahte ii leat leaika, ja muhtumiin ii oainne maidege.
Dás oainnát filmmaža man Kim Hallgeir Berg lea almmuhan iežas facebook bokte. Ođasmahte ášši jus filbma ii iđe dalán:
Posted by Halgon Berg on 18. desember 2015
Okto barggus
Son vuoddjá Ávanuori gili siste, ja danne ferte hui várrogasat vuoddjit.
– Dáppe gili siste vázzet ollu olbmot, ja vudjet biillat ja go ii oainne nu bures de ferte váruhit vai ii vuoje biillaid dahje olbmuid njeaiga. Guokte biilla ledje eske beaškkehan oktii, ja moadde biilla ges darvánan, muhto mun in astta daid álgit veahkehallat go lean okto dál vuodjime dáppe ja mun ferten doalahit geainnuid rabas, lohká son.
Loga maid: Áviisa ii olle odne
Dálkedieđuid čuovvut
Berg lea diibmá vásihan ahte jorihii birra muohtaboltunbiillain garrá dálkin, ja danne diehtá ahte gánnáha várrogas leahkit. Son muitala son ferte hui dárkilit čuovvut mielde dálkedieđáhusaid.
– Daid ferte čuovvut mielde ja oaidnit goas biegga ložže veaháš, go de diehtá goas sáhttá albma láhkai vuoiŋŋastit, lohká Berg ja rehkenastte otná eahkedii biekka ložžet.
Dálki ja uđasvára
Stáhta Geaidnodoaimmat dieđiha ollu geaidnogaskkaid Finnmárkkus leat gitta dálkki dahje uđasvára geažil. Diibmu 14.30 leat 26 geaidnogaskkat gitta, moatti sajes leat ráidovuodjimat ja maiddái guokte feargagaskka leat bissehuvvon garrá dálki geažil.
Ráidovuodjimat
Riikageainnus 93:as, gaskkal Suolovuomi ja Silisávžži lea ráidovuodjin dálki geažil. Riikageainnus 94 Fálesnuori šaldis Hammerfestii lea maid ráidovuodjin go lea nu garrá dálki.
E6 geaidnu lea gitta Lákkovuonas go lea uđas mannan ja lea uđasvára. Ođđa árvvoštallan dáhkko diibmu 18.00. E6 lea maid gitta Suoidneleavšši badjel dálki geažil.
E69 lea guđa sajis gitta, earret eará gaskkal Davvenjárggatunealla ja Honnesváhki.
Geainnuin lea ráidovuodjin ja leat gitta dassái eará diehtu boahta Sáthta Geaidnodoaimmahagas.
Das sáhtát čuovvut Stáhta Geaidnodoaimmahaga johtolatdieđuid.
