Vibeke Fürst Haugen šaddá NRK vuosttaš nissonlaš áibmomediahoavda.
Duorastaga maŋŋelgaskabeaivvi ovdanbuvttii stivrajođiheaddji, Birger Magnus, ođđa NRK-hoavdda. Vibeke Fürst Haugen oaččui sihke rámi ja rásiid stivrrajođiheaddjis.
– Olu giitu rásiin ja fiinna sániin. Mun lean nu ilus ja movtta dál, ledje ođđa áibmomediahoavdda vuosttaš sánit go gulai ođđasa.
Son dadjá leat gearggus bargagoahtit virggis, man ieš čilge leat riikka somámus mediajođiheaddjibargun.
Go jerrui mii šaddá su deháleamos bargu áibmomediahoavdan, ovddidii Fürst Haugen dan ahte doalahit NRK buori posišuvnna mediaeanadagas.
– Lea olu mii doaibmá bures NRK:s. Diibmá lei mis min gievrramus jahki, mis lea alla luohttevašvuohta, alla geavaheapmi ja alla beaggin. Deháleamos šaddá doalahit dan posišuvnna, mii fal gáibida olu mis, dajai son.
Vásáhusat NRK:s
Ođđa hoavddas leat olu bargovásáhusat NRK:s ovdalaččas.
– Son dovdá NRK bures, ja son lea leamaš jođihanjoavkkus maŋimuš ovcci jagi ja lea doaibman áibmomediahoavdan go Thor Gjermund Eriksen leamaš eret, dajai Birger Magnus go ovdanbuvttii ođđa hoavdda.
Magnus maid rámidii Fürst Haugena diehtoáŋgirvuođa gávnnaheamis ođđa vugiid bargat.
22 ohcci
Ođđa hoavdda almmuhedje dušše beaivvi maŋŋel go ohcanlistu lei almmuhuvvon.
Oktiibuot ledje 22 ohcci, muhto dušše moaddásis lei gelbbolašvuohta dán virgái.
Dálá áibmomediahoavda Thor Gjermund Eriksen álggii virgái jagi 2013:s ja luohpa virggis dán jagi.
