Mannan dálvvi gumppenálli registreren čájehii ahte ledje uhcit čivgamat Norgga beale gumppeguovlluin ja rádjaguovlluin diimmá ektui. Lea vuosttaš geardde go leat duođaštuvvon uhcit go 100 gumppe riikkas, muhto gumpenálli lea nationála nállemihtus.
Mannan dálvvi gumpevakšunlogut Norggas lea dál almmuhuvvon ođđa raporttas maid Høgskolen i Innlandet, Evenstad lea ráhkadan Rovdata ovddas.
Registreremat čájehit ahte ledje oktiibuot ovcci gumpečivgama, golbma čivgama ledje Norgga beale gumpeguovllus Mangenis, Settenis ja Østmarkas, mat leat Norgga hálddašanguovllus. Dat guhtta eará gumpečivgamat ledje gumpeguovllus mii lea guktui beale Norgga ja Ruoŧa rájá; Ulvåa, Juvberget, Kynna, Kockohonka, Kymmen ja Fjornshöjden, čállá Rovdata.no.
Norggas leat dál 89-92 gumppe ja lea vuosttaš geardde go lea uhcit go 100 gumppe siskkobealde riikkarájá, mii lea 30 proseantta njiedjan diimmá ektui. Eanaš gumppet lea duođaštuvvon Máttanuorta-Norggas, Innlandet ja Viken guovllus. Guokte lea duođaštuvvon Romssas ja Finnmárkkus ja soaitá velá okta Trøndelágas.
