Ruoššas registrerejuvvon personbiillat eai beasa šat Norgii golggotmánu goalmmát beaivvi rájes. Dat lea Norgga ráđđehusa mearrádus ja dainna čuovvola EU-riikkaid mearrádusa.
– Norga ovttas ovttasbargoguoimiiguin reagere brutála fálleheapmái man Ruošša dahká Ukraina vuostá, dadjá Norgga olgoriikaministtar Anniken Huitfeldt preassadieđu bokte.
– Lea dehálaš ahte sankšuvnnat leat beaktilat dainna lágiin ahte mii buoremus lági mielde caggat sisaboađuid maid Ruošša stáhta dárbbaša vai ruhtadit soađi, dadjá Huitfeldt.
Gielddusis leat muhtun rájes spiehkasteamit, ovdamearkka dihtii go ruoššat áiggoše oassálastit hávdádemiin Norggas.
Norgga rádjá lea okta dain man ruoššat sáhttet rasttildit turistavisumiin. Oallugat leat Norgga bokte mátkkoštan viidásit Eurohpái. Ruššii registrerejuvvon biillain ain sáhttá vuodjit Norgii jus leat eanet go ovcci čohkkánsaji biillas.
