Leat čielga sohkabealerohusat das masa nissonolbmot ja almmáiolbmot illudit eanemusat juovllaide. Nissonolbmot čiŋahit ruovttu ja gáhkkejit mánáiguin, almmáiolbmot ges vuoiŋŋastit.
MatPrat, manne- ja biergodiehtojuohkinkantuvra, láve almmuhit jahkásaš juovlaiskama. Lea fitnodat Opinion mii lea jearahan olbmuid dan birra. 31 proseantta almmáiolbmuin áibbašit eanemusat lupmui ja joavdelastimii, muhto dušše 18 proseantta nissonolbmuin vástidit dan seamma. Beali eanet nissonat (47 proseantta) go albmát (23 proseantta) vástidit sin mielas lea somámus čiŋahit dálu juovllaide ja juovlavieruide. Maiddái láibumis leat čielga sohkabealerohusat. Nissoniid (18 proseantta) mielas lea somá láibut mánáiguin, muhto dušše 8 proseantta albmáin lohke dan.
– Lea olu bargu ráhkadit hávskes juovllaid. Jáhkán eanaš nissonat dihtet dan ja danin eai oainne juovlabasiid makkárge luopmun dahje friijaáigin. Iskan čájeha ahte leat ain sohkabeale erohusat juovlaráhkkanemiin, lohká MatPrat servodatanalytihkkár Anne Zondag.
Borramuš lea dehálabbot go juovlaskeaŋkkat ja dás vástidit sohkabealit, albmát 61 proseantta ja 58 proseantta, áibbašit deaivvadit bearrašiin ja ustibiiguin. Eanet albmát (59 proseantta) go nissonat (46 proseantta) muitalit sii áibbašit eanemusat njálgga borramuššii ja juhkamuššii.
Dušše 8 proseantta albmáin ja nissoniin vástidit ahte lea somámus oažžut juovlaskeaŋkkaid juovllaid. Beali eanet nissonat (41 proseantta) go albmát (22 proseantta) áibbašit eanemusat gullat juovlamusihka ja geahččat juovlafilmmaid.
