-Almmuhus-
-Almmuhus-
OĐĐASAT Nissonat ellet guhkit, dievddut dinejit eambbo

Nissonat ellet guhkit, dievddut dinejit eambbo

-

-

Nissonat ellet guhkimusat ja barget eanemus ruovttus, dievddut fas dinejit buoremusat ja hárjehallet eanemus. Geahča dás makkár eará erohusat sohkabeliin leat Eurohpás.

Gaskamearálaččat eallá Eurohpás nissonolmmoš 84,2 jagi ja dievdu fas 80,5 jagi.

Buot EU-riikkain ellet nissonolbmot guhkit go dievdoolbmot, Norggas eallá nisu gaskamearálaččat 84,2 jagi ja dievdu 80,6 jagi.

Go nissonolbmot ellet guhkimus, de gávdnojit maiddái Eurohpás eanet nissonat go dievddut.

Dušše Luxembourgas, Maltas ja Ruoŧas leat eanet dievdoolbmot, čájeha Eurostat guorahallan mii almmuhuvvui gieskat.

 

Nissonat dávjjit okto fuolaheaddjin

Iskkadeapmi lea dahkkon buot 28 EU-riikkas, dasa lassin leat čohkken dieđuid Islánddas, Sveitsas ja Norggas, čállá Statistihkalaš guovddášdoaimmahat, mii leat čohkken guorahallamiid Norgga loguid.

Eurohpás leat olu eanet nissonolbmot ja dievdoolbmot okto fuolaheaddjin.

7,7 proseantta gaskal 25- ja 49-jahkásaš nissonolbmuin leat okto fuolaheaddjit, dievdduid searvvis ássá dušše 1,1 proseantta okto mánáiguin.

 

Bargo- ja oahppoerohusat

Dán áigge gazzet eanet nissonolbmot alit oahpu Norggas, ja nu dahket maiddái muđui Eurohpás. 33 proseantta nissoniin lea alit oahpu ja dievdduid searvvis fas 29 proseantta.

Dattetge lea dábáleabbo ahte nissonolmmoš bargá oasseáiggis ja dine unnit. Čájehuvvo maiddái ahte bargosajiin leat eanet dievddut go nissonat jođiheaddjin.

Gaskamearálaččat dine nissonolmmoš 16 proseantta unnit go dievdoolmmoš.

Sohkabealit bissot sullii seamma guhká bargoeallimis ja bargguhisvuohta lea maid sullii seamma stuoris nissoniid ja dievdduid searvvis.

 

Borgguhit, hárjehallat ja deddet eanemus

24 proseantta dievdduin borgguhit, nissoniid searvvis 16 proseantta.

Čájehuvvo maiddái ahte dievdoolbmot leat čeahpibut hárjehallat go nissonat, 36 proseantta dievdduin hárjehalle unnimusat 2,5 diimmu vahkkui 2014:s. Nissoniid searvvis hárjehalle 26 proseantta seamma olu.

Vaikke dievddut leat sávrribut hárjehallamis, de čájehuvvo ahte sii giksašuvvet buidodagain eanet go nissonolbmot.

 

Seamma duhtavaččat

Stuorámus earru sohkabeliid gaskkas gávdno ruovttuin.

79 proseantta nissonolbmuin barge diibmá viessobargguid ja málestedje beaivválaččat, dušše 34 proseantta dievdduin dahke dan seamma.

Vaikke leat stuora erohusat sohkabeliid gaskkas Eurohpás, de čájehuvvo ahte olbmot leat sullii seamma duhtavaččat iežaset dilálašvuođain, čállá Statistihkalaš guovddášdoaimmahat.

-Almmuhus-