Oktiibuot leat 183 400 olbmo máksán bivdodivada 2023/2024 bivdojagis. Dat lea vihtta proseantta unnit go jagi ovdal, ja lea vuolimus lohku maŋimuš 25 jagis.
Bivdogeahččaleamiid lohku lea maid leamašan unnit go bivdojagis 2022/2023. Dat boahtá ovdan Statistihkalaš guovddášdoaimmahaga (SSB) loguin.
Oktiibuot cevze diibmá 11 500 olbmo dan geahččaleami mii lea gáibádussan bivdui mii álggii cuoŋománu vuosttaš beaivvi 2023 ja bisttii gitta dán jagi njukčamánu 31. beaivái.
Návdet
SSB:s ii leat čielga fasihta mii lea sivvan dasa go unnit go ovddit jagiid leat máksán bivdodivadiid. Sii návdet ahte vejolaš sivva dasa sáhttá leat dat go Statskog ja moadde duottarstivrra giddejedje dahje ráddjejedje rievssatbivddu Lulli-Norggas ja Gaska-Norggas mannan čavčča heajos rievssatlohkanbohtosiid geažil.
Finnmárkkus mákset eanemusat
Fylkkaid gaskkas lea Finnmárkku gos lea stuorimus oassi sis geat mákse bivdodivada. Doppe mákse divada 16 proseantta dievdduin ja golbma proseantta nissoniin. Innlandet fylkkas mákse fas 12 proseantta ja 1,7 proseantta.
Lassaneapmi
Nissoniid mearri lassana jahkasaččat veahážiid mielde Bivdiidregistaris.
544 000 registrerejuvvon bivdis 2023/2024 bivdojagis ledje 16 proseantta dan logus nissonat. Sin gaskkas geat leat máksán bivdodivada ledje oktiibuot 10 proseantta nissonat.
(©NTB)
