Návuotna lea dat suohkan davvin gos eanemusat gávppašedje interneahtas diibmá.
Dušše Oslos ja Vikenis gávppašedje eanet juohke olbmo nammii go Romssas ja Finnmárkkus. Nu čájeha Klarna 2021 gávppašanstatistihkka, mas leat badjel 12 000 Norgga neahttagávppi mat atnet sin gávppašan- ja máksinbálvusa.
– Neahttagávppašeapmi lea eanemusat lassánan Oslo ja Viken fylkkain. Diibmá jokse sii Romssa ja Finnmárkku, gos eanemusat gávppašii juohke ássi gaskamearálaččat. Davvin eai gávppašan unnit go ovdal, muhto Oslo birrasiin álge olu eambbo gávppašit neahtas pandemiijaáigge, dadjá Klarrna márkandirektevra Thomas Elvestad preassadieđáhusas.
Návuona suohkanis gávppašii gaskamearálaččat juohke ássi 45 proseantta eambbo go gaskamearálaš norgalaš. Návuona maŋis lea geas Dielddanuorri (43 proseantta badjel gaskameari) ja Davvesiida (37 proseantta eanet),
Doppe gos unnimusat gávppašedje Norgga davimus fylkkas, lei Várggáid ja Divrráid suohkaniin. Finnmárkkus ja Romssas leat neahtas erenoamážit gávppaštan faláštallan- ja astoáigebuktagiid.
