2024 ođđajagemánu vuosttaš beaivvi rájes ferte máksit lassivearrodivada ja vejolaččat maid tuollu go oastá gálvvu mat mákset vuollel 350 kruvnna olgoriikka neahttabuvddain.
Dál berret dárkkistit gáibida go du olgoriikka neahttabuvda Norgga lassivearrodivada/momssa. Jus dan dahká, de berre dat leat registrerejuvvon Norgga registarii mii guoská neahttagávppašeapmái ja man namma lea VOEC (VAT on E-commerce). Jus ii leat registrerejuvvon, de bissehit gálvvu Norgga rájá alde dassážii go Norgga momsadivat ja vejolaš tuollu lea mákson. Jagi 2020 rájes leamaš gálvočilgenspiehkastat buot gálvvuid ovddas mat mákset vuollel 350 kruvnna.
– Dat gálvočilgenspiehkastat loahpahuvvo buot gálvvuid ovddas mat eai leat mielde VOEC-ortnegis ja ferte máksit tuollu ja momssa buot gálvvuid ovddas vuosttaš kruvnna rájes. Speditevra sáhttá gáibidit hálddašandivada, lohká Tuolloetáhta ossodatdirektevra Åge Skår.
– Lea Norga Vearroetáhtta mii hálddaša VOEC-registara skatteetaten.no ja dál lea badjel 2300 fitnodaga mielde VOEC-ortnegis. Vaikko mii registreret dađistaga neahttabuvddaid, de berre gálvooasti dárkkistit ferte go máksit Norgga momssa neahttabuvdda kássas gos gávppaša, lohká Vearroetáhta ossodatdirektevra Rune Langsø Johansen, Vearroetáhta ja Tuolloetáhta oktasaš preassadieđáhusas.
Speditevrrat, nu go PostNord, Posten Bring, DHL ja earát, sáhttet čilget /deklareret gálvvuid du ovddas. Sáhtát geavahit tuolloetáhta Importkalkulatoren rehkenastit man olu tuollu ja momssa fertet máksit jus neahttagávpi ii leat mielde VOEC-registaris.
