Camilla Brattland Romssa universitehtas lea nammaduvvon dan kommišuvnna lahttun, mii galgá geahčadit gádden-, ráhkadan- ja doaibmangeatnegasvuođa mearrabiebmoealáhusas.
Camilla Brattland Romssa universitehtas lea nammaduvvon dan kommišuvnna lahttun, mii galgá geahčadit gádden-, ráhkadan- ja doaibmangeatnegasvuođa mearrabiebmoealáhusas.
Kommišuvdna lea dan mearrabiebmoindustriijadieđáhusa čuovvoleapmi, man Stuorradiggi dohkkehii njukčamánus.
– Post.doc. Camilla Brattland máhttá ollu mearrasámi diliid ja vuoigatvuođaid birra, ja danne mii leat hui duhtavaččat otná nammademiin maŋŋá Sámedikki ja Guolástusdepartemeantta konsultašuvnnaid, dadjá sámediggeráđđi Silje Karine Muotka preassadieđáhusas.
Almmuhuvvo fargga
– Kommišuvnna mandáhtta almmuhuvvo hui fargga, ja Sámediggi oaivvilda ahte mandáhtas maid galgá leat gohčus árvvoštallat servodatekonomalaš váikkuhusaid mearrasámi servodagaide, dadjá Muotka.
Guolástusministtar maid duhtavaš
– Mis leat hástaleaddji mearrádusat maid galgat gieđahallat guolástuspolitihkas. Barggus man kommišuvdna dál galgá doaimmahit lea alla árvu, ja mun lean duhtavaš go leat ožžon hirbmat dohkálaš joavkku, dadjá guolástusministtar Per Sandberg.
Kommišuvnnas leat čuovvovaš olbmot:
Lars Mathiesen, professor (ekonoma), NHH, Hordalánda
Erik Arnesen, ráđđealmmái, Ákŋoluokta, Finnmárku
Maiken Bjørkan, dutki, Nordlandsforskning, Nordlánda
Bjørn-Petter Finstad, historihkkár, Romssa universitehta, Romssa fylka
Bjørn Fredriksen, ealáhushoavda, Leaŋgáviikka suohkan, Romssa fylka
Benedikte Moltumyr Høgberg, professor (jurista), Oslo universitehta
Camilla Brattland, post doc, Romssa universitehta, Romssa fylka
Patrick Sørdahl, dutki, Nofima, Romssa fylka
Kommišuvnnas galgá plána mielde leat vuosttaš čoahkkin miessemánu 30. beaivvi.
